“Navbahor” klubi yangi mavsum oldidan Namangan shahar, Davlatobod tumanidagi "Markaziy" stadionida taqdimot marosimini o'tkazdi, deb xabar berdi “Navbahor” PFK matbuot xizmati.

Tadbirda Namangan viloyati hokimi, viloyat futbol associaciyasi prezidenti Shavkatjon Shokirjanovich Abdurazzoqov, sektorlar rahbarlari, “Navbahor” PFK vice-prezidenti Otabek Arifovich Samatov boshchiligidagi klubimiz rahbariyati va xodimlari, “Markaziy” o'yingoh DUK rahbariyati hamda xodimlari, “Navbahor” jamoasi murabbiylar shtabi vakillari va futbolchilari, muxlislar ishtirok etishdi.

Marosimda viloyatimiz rahbari Shavkatjon Abdurazzoqov so'zga chiqib, “Navbahor” milliy chempionatimizga asos solinganidan buyon Superligamizning muntazam ishtirokchisi, o'z nomiga ega, sovrindor jamoalardan biri ekanligini takidlagan holda, jamoa yangi mavsumga puxta tayyorgarlik ko'rganligi, o'quv-mashg'ulot yig'inlari BAA va Turkiyada olib borilganligi, u erda xorij jamoalari bilan nazorat uchrashuvlari o'tkazilganligini takidladi.

Shuningdek, viloyatimiz hokimi “Navbahor” tarkibiga asli namanganlik bo'lgan hamda yosh va iqtidorli futbolchilar jalb etilishganini aytgan holda, yangi mavsumda “lochinlar”ga omad yor bo'lishini tiladi.

Shundan keyin o'tgan mavsumda 3-o'rinni qo'lga kiritgan “Navbahor” murabbiylar shtabi azolari va futbolchilarga bronza medallarini viloyat rahbari Shavkatjon Abdurazzoqov hamda sektor rahbarlari tantanali ravishda topshirishdi.

So'ngra, futbolchilarga yangi mavsum o'yinlarida maydonga tushadigan futbolkalar topshirildi.

Yangi mavsumda Umidjon Ergashev - 1, Shukron Yo'ldoshev - 16, Shahzod Toirov - 4, Sherzod G'ulomjonov - 6, Azimjon Ahmedov - 7, Shohmalik Komilov - 8, Zabihillo O'rinboev - 9, Shahzodbek Ubaydullaev - 10, Po'latxo'ja Xoldorxonov – 11, Saidazamat Mirsaidov – 12, Benjamin Teydi - 13, Javohir Abdujabborov-15, Ruslanbek Jiyanov - 17, Mirzohid G'ofurov – 19, Rian Islomov - 21, Asadbek Jo'raboev - 22, Jahongir Tursunov - 23, Pedro Karvalo - 29, Muhammadbobur Mo'ydinov - 32,Sergey Karpovich - 33, Guedes Gilerme - 36,Alisher Odilov - 37, Komiljon Tojidinov - 55,Abbosjon G'ulomov - 70, Navro'zbek Iminjonov - 71, Igor Gabriel - 99-raqamlar ostida harakat qiladigan bo'ldi.

"Keyin esa jamoa bosh murabbiyi Sergey Lushchan va tajribali himoyachi Mirzohid G'ofurov so'zga chiqib, yangi mavsumda ijobiy natijalarga erishish, muxlislarga quvonch ulashish uchun barcha imkoniyatlarni ishga solishlarini takidlashdi.
Shuningdek, tadbir davomida jamoaning murabbiylar shtabi azolari tanishtirib o'tildi, muxlislar tomonidan viloyat hokimi Shavkatjon Abdurazzoqovga milliy libosimiz - to'n va Chust do'ppisi sovg'a qilindi, monitorda maxsus tayyorlangan 2024 yilgi mavsumning eng yorqin lahzalari aks etgan videorolik namoyish etildi.
Shu tariqa, bugungi taqdimot marosimi ko'tarinki ruh va kayfiyatda bo'lib o'tdi", - deyiladi xabarda.

Foto: "Navbahor" PFK matbuot xizmati

"Navbahor" yangi mavsum oldidan tanishtiruv marosimini tashkil etdi