Учрашувнинг 54-дақиқасида "Маморе" футболчиси Дави гол урганидан сўнг "Уберландия" ўйинчиларини оғзаки ҳақорат қилди, бу эса оммавий мушташувга олиб келди.
Ҳодиса якунларига кўра, бош ҳакам Фернандо Патрик "Маморе"нинг 21 нафар ва "Уберландия"нинг 22 нафар футболчисини майдондан четлатди. Бундан ташқари, иккала томондан саккиз нафар мураббий ва икки нафар менеджер қизил карточка олди — жами 53 киши.
Содир бўлган воқеадан сўнг рефери учрашувни "Маморе" фойдасига 3:1 ҳисобида тўхтатишга қарор қилди. Протоколда ҳакам ўйинни давом эттиришнинг имкони бўлмай қолганини қайд этди. Шунингдек, Патрик "Уберландия" менеджери томонидан бўлган таҳдидлар сабабли полицияга ариза берилганини маълум қилди.
Ушбу ўйин қизил карточкалар сони бўйича жаҳон футболида рекорд ўрнатди. Бунга қадар энг кўп четлатишлар сони 36 тани ташкил этган — рекорд кўрсаткич 2011 йил 27 февраль куни Аргентина чемпионати бешинчи дивизионининг "Атлетико Клейпол" ва "Викториано Аренас" жамоалари ўртасидаги ўйинда қайд этилган эди.