Ushbu uchrashuvdan so'ng joriy mavsumda ko'plab gollari bilan jamoasining g'alabalariga munosib ulush qo'shayotgan Bobir Abdixoliqovning fikrlari bilan qiziqdik.
"Kumush medalni qo'lga kiritishimizda murabbiylar, futbolchilar umuman "Nasaf" oilasidagi barchaning hissasi bor. Jamoadagi futbolchilar yosh bo'lishiga qaramasdan har bir o'yinda g'alaba uchun maydonga chiqishdi va medallarga ega chiqish uchun 200 foiz kuch bilan harakat qilishdi. Buning mevasini mana bugun ko'rib turibmiz. Har bir uchrashuvda gol urish uchun intilaman, chunki bu vazifamdir. Balki bu yil o'sishga erishdim deyishim mumkin. Lekin ko'p vaziyatlardan foydalana olmayapman. Buning uchun o'z ustimda ishlashdan to'xtamasligim kerak. Ayrim pallalarda yuz foizlik imkoniyatlar bo'ladi.
Jamoada o'yinni shakllantirish va yo'lga qo'yishda murabbiyimizning tajribasi katta rol o'ynadi. Aksariyat futbolchilar bilan klub akademiyasida birga katta bo'lganmiz. Ichki muhit, o'zaro munosabat, o'yin barchasi yaxshi bo'lgani uchun ham oraliqdagi tanaffuslardan so'ng qiyinchiliklar bo'lmadi. Moliyaviy muammolar bo'ldi. Ammo biz rahbariyatga ishonamiz. "Nasaf" hech qachon bunday holatga tushmagan edi. Biz futbolchilar maydonda borimizni berib o'ynashimizni kelishib olgan edik. Muxlislarimizga qo'llab-quvvatlab turishgani uchun minnatdorchilik bildiraman ",- deydi Bobir Abdixoliqov.
