Тимур Кападзе: "Рақибнинг ҳимоявий услуби бизга қийинчилик туғдирди"

Ўйин ҳақида

- Қийин ўйин бўлди. "Бунёдкор" ҳозирги вазиятидан келиб чиқиб борини берди. Ҳар икки жамоа ҳаракат қилди. "Бунёдкор" ҳимоявий услуб танлади ва бу бизга қийинчилик туғдирди. Дуранг ёмон натижа эмас деб ўйлайман. Бундан ҳам яхшироқ ўйнашимиз мумкин эди. 

- Бундан 10 йиллар олдин “Пахтакор" - "Бунёдкор" учрашувида "қалдирғочлар" 2:0 ҳисобида ғалаба қозонаётган эди. Кейин "Пахтакор" 3 та гол уриб ютиб кетган. Ўша 3 голдан иккитасида "Пахтакор" футболчилари фейр-плейга амал қилмасдан ўйинни давом эттирганидан кейин урилганди. Мураббийлар вақт чўзиш ва ростдан жароҳат бўлганини сезишади. Вазиятдан келиб чиқиб, сиз ўйинда фейр-плей қилмасдан тўпни қайтармасликни нормал холат деб ҳисоблайсизми?

- Бугун кимдир ростдан ҳам жароҳат олди. Балки вақт чўзгандир, билмадим. Вақтни кўпроқ ҳакам чўзди. 

- Тоировнинг холати қандай?

- Яхши, ҳаммаси жойида. Футбол осон спорт эмас, жароҳатлар бўлади.

- Ўзбек футболига арабча футбол кириб келаётгандек. Бу борада фикрингиз қандай?

- Билмадим, бунақа холатлар кўпроқ бизга дуч келаяпти. Балки бошқа ўйинларда ҳам бордир. Вақт чўзиш ёмон холат, мен жамоамга шуни тушунтираяпман. Эртага терма жамоалар билан ўйинда бошқача футбол бўлади. Футболчилар майли, ҳакам бугун вақтни жуда кўп йўқотди. 

- Ўзбекистон ҳакамлар маркази сизни ҳам эксперт сифатида таништирди. Вазиятлар таҳлилида қатнашаяпсизми?

- Тўғрисини айтсам, бунга вақтим йўқ. Биз кузатувчимиз, ўзи марказда эксперт ҳакамлар бор. Жуда муҳим вазиятлар муҳокама қилинаяпти. Ҳар турда ҳакамлик бўйича саволлар бўлаяпти. Ҳакамлик ривожланса, бундан футболимиз ютади.

- "Бунёдкор” ҳимоявий услуб танлашини кутганмидингиз?

- Бу борада саволлар бор эди. Аммо, "Бунёдкор"дан бугун ҳимоявий ўйин кутмагандим. Янги мураббий келди, қандай услубда ўйнаши қизиқ эди. Унинг услуби ҳақида ўрганиш олиб бордик, аввал ишлаган жамоаларини таҳлил қилдик. 5-2-3 услубда ўйнади, бу ўйинни ютсак бўларди.

- "Бунёдкор" бош мураббийи бугун 2 очко йўқотгани ҳақида айтаяпти. Бу борада сиздаги фикр қандай?

- Биз охирида урганимиз учун шунақа фикр билдирган бўлиши мумкин. Эртароқ урганИмизда, ютиб кетишимиз ҳам мумкин эди. Бунақа ҳимоявий услуб нафақат биз каби ёш жамоага, балки кучли жамоаларга ҳам қийинчилик туғдиради.