Шацких расмий дебютида қақшатқич мағлубият қабул қилди

Қирғиз Республикаси Юқори лигасининг 1-тури доирасида Максим Шацких бошқарувидаги "Азия" клуби ўз майдонида "Талант" жамоасини қабул қилди. Ўзбекистонлик мутахассис учун расмий дебют саналган мазкур учрашув мезбонларнинг йирик ҳисобдаги мағлубияти билан якунланди.

Аслида ўйин "Азия" учун умидли бошланган эди. Учрашувнинг 5-дақиқасидаёқ Агапов пенальтини аниқ амалга ошириб, ҳисобни очди. Бироқ тез орада ташаббусни ўз қўлига олган меҳмонлар биринчи бўлимнинг ўзидаёқ иккита гол уришга муваффақ бўлишди. 13-дақиқада Карвацкий мувозанатни тиклаган бўлса, 26-дақиқада Кобахидзе жамоасини олдинга олиб чиқди.

Иккинчи бўлимда ҳам устунликни бермаган "Талант" футболчилари Поланко (59-дақиқа) ҳамда Мурзаков (74-дақиқа) томонидан киритилган голлар эвазига ҳисобни йирик кўринишга келтиришди. Шу тариқа, Шацких шогирдлари мавсумни ўз уйидаги аламли мағлубият билан бошлашди.

Қайд этиш жоиз, "Азия" таркибида ўзбекистонлик футболчи Фарҳод Бекмуродов ва ўтган мавсумни Тошкентнинг "Локомотив" клубида ўтказган Акаки Шулая тўп тепади.