Сергей Лушчан: "Омадимиз келиб мағлубиятдан қутулиб қолдик. Жамоанинг 40% йиғиннинг сўнгги кунларида сафимизга келиб қўшилди"

"Жуда оғир ўйин бўлди. Айниқса биринчи бўлим. Омадимиз келиб мағлубиятдан қутулиб қолдик. Менимча, ўйинга нотўғри тактика танлаганимиздан далолат. Беларусдаги йиғинимиз доирасида айрим муаммоларга дуч келди. Жамоанинг 40% йиғиннинг сўнгги кунларида сафимизга келиб қўшилди. Улар ўз юртида нималар  билан банд бўлганини билмайман. Уч нафар футболчи эса Тошкентда индивидуал тарзда машғулот олиб борди. Футболчилар ўйинга умуман тайёр эмас эди. Қўрқмасдан, йиғинда тўлиқ иштирок этган футболчилардан иборат таркибни майдонга тушираверишимиз керак эди. Шунда биринчи бўлим биз учун осонроқ кечган бўларди. Натижадан ўта кўнглим тўлди, сабаби мағлубиятдан қутулиб қолдик. Биринчи турдан кейин "Динамо" чемпионлик учун курашадиган жамоалардан бири бўлади дея айтган эдим. Жуда яхши жамоа тузилган. Мураббийлар штабига ва футболчиларга респект. Икки учрашувда ҳам бундай рақибга қарши дуранг қайд этганимиздан хурсандман. Ўйин мухлисларга ёқди деган умиддаман. Албатта, маҳаллий мухлислар ўз жамоасининг ғалабасини кутган эди. Юлдузлар бугун биз томонга порлаган шекилли" - дея фикр билдирди Сергей Лушчан бугунги учрашув ҳақида.

- Комилов бугун захирадан майдонга тушиб, ўз жамоасининг икки голида ҳам иштирок этди. Комилов "Динамо"да ҳам ўйнаган эди ва жамоадан норози бўлиб кетган. Ушбу фактор унга бугун қўшимча мотивация берганмикан?

- Билмадим, унинг ўзидан сўрасангиз яхшироқ бўлади, назаримда. Шоҳмалик асосий таркиб футболчиси. Мен у билан кўп мулоқот қиламан. Ўзи ҳам захира ўйинчиси эмаслигини тушунади, аммо у сабр қилиши керак ва бизга кўпроқ иккинчи бўлимда майдонга тушиб, ўйинни кучайтириши кераклигини айтамиз. Танаффусда таркибимизни ҳам кучайтириб олдик.

Бугун биз хатога йўл қўйдик. Биринчи тур бўлгани сабабли, тажрибалироқ футболчиларни майдонга туширган эдик. Масалан, Тейди Тошкентда бор-йўғи уч кун машғулот ўтказди. Хориждаги йиғинимизда иштирок этмади. Сезар ва Габриэл йиғин тугашига беш кун қолганида сафимизга қўшилишди. Ёшлардан иборат таркибни туширишга бироз чўчидик, аммо ҳаёт шундай экан. Ким ўйинга тайёр бўлса, ўша футболчини майдонга туширишимиз керак экан.

Биринчи бўлимни зўрға якунлаб олдик, 20-дақиқанинг ўзидаёқ ўзгаришлар қилишимиз мумкин эди. Керакли хулосалар чиқардик.

- Бир нечта футболчилар йиғинда иштирок этмади дедингиз. Ўша футболчилар асосий ишини ташлаб, нима билан банд бўлди?

- Мен ҳам ўзимга ўзим шу саволни беряпман. Улар ўз ватанларида нималар қилганини билмайман. Масалан, Тейди паспорти туфайли Беларусь ва Россияга киритилмас экан. Нигерия фуқаролари ҳеч қанақасига Беларусга киритилмас экан. Масалани ҳал қила олмадик. У Тошкентда индивидуал тарзда шуғулланди, аммо индивидуал машғулотларда қанчалик меҳнат қилгани менга қоронғи. 20-дақиқадан сўнг у йўқолиб қолди. Сезар билан сўнгги дақиқагача шартнома имзолай олмадик. Океан орти, вақтлардаги фарқ ва агентлар билан бўлган муаммолар туфайли. Игорь эса бир ярим йил давомида уйига бормаган экан, биз унга уч кун қўшимча дам бердик. Сафимизга эса биз кутган формада қайтмади. Менимча, Копакабана ва карнаваллар ўз таъсирини ўтказган бўлса керак. Ахир у бразилиялик.

Болтабоев сўнгги бир ярим ой давомида "Нефтчи"дан кета олмади. Йиғин тугашига икки кунга қолганда сафимизга қўшилди. Уни учинчи турга келибгина асосий таркибга қўшсак керак. Муаммолар етарлича. Менга Ғиёсов жуда ёқди, йиғинларда ҳам буни сездим. Жуда сифатли ўйинчи экан. 

Мирсаидов ва Жиянов ҳам беш кун қолганда келишди. Улар "Навбаҳор"да ижарада ва трансфер ойнасида улар бошқа клубга ўтиши ва ўтмаслиги сабабли шундай бўлди. Қаранг, ўйинчи жамоа билан бир ҳафта бўлмадими, демак у яқинлашиб келаётган икки ҳафтадаги ўйинларда иштирок эта олмайди. Бизнинг футболчилар эса уч ҳафта давомида жамоа билан бирга эмас эдилар. Улар танаффус даврида нима билан банд бўлганидан хабарим йўқ, лекин сен профессионал футболчисан ва ўз спорт ҳолатингга жиддий қарашинг керак, назаримда. Нима бўлганда ҳам улардан миннатдорман, дуранг қайд эта олдик. Оғир ўйин бўлди. Комилов ғалаба голини ҳам киритиши мумкин эди.

- Суперлига жадвали жуда зич, нақд тўрт жамоа 30 очко тўплаган. Суперлигадаги рақобат ҳақида фикр билдириб ўтсангиз...

- Агар биз сўнгги учрашувда "Пахтакор"ни мағлуб этганимизда иккинчи ўринга жойлашиб олган бўлар эдик. Мен бундай рақобат бўлган мавсумни эслай олмайман. Бизда иккинчи мақсад ҳам бор. Бу Кубок баҳслари. Насиб қилса, икки мавсумда кетма-кет финалда ўйнаймиз дея режа қилиб турибмиз.

Менинг фикримча, Суперлига тақдири сўнгги 7-8та турда ҳал бўлади. Бунга 100% ишонаман. Ўтган мавсумда ҳам шундай бўлганди, сўнгги 8 турга катта эътибор қаратгандик.

- "Навбаҳор" трансферлар ойнасида анча актив бўлди. Футболчиларни сотди ва ўз сафига қўшиб олди. Трансфер кампаниясидан қанчалик кўнглингиз тўлди? Масалан, мавсум аввалида жамоага келган Сергей Карпович нега ярим йилдан сўнг жамоани тарк этди? Одилов қанчалик катта йўқотиш?

- Сергейга Беларусда янги мавсумда чемпион бўладиган жамоа таклиф билан чиқди. Унга "Навбаҳор" шартномаси билан бир хил шартнома таклиф қилишди. У фарзандли бўлди, аёли эса Беларусда ёлғиз эди. У биздан илтимос қилди ва биз унга рад жавобини бермадик. Чақалоқли аёл турмуш ўртоғисиз қийналиб қолган эди. Албатта, йўқ дейишимиз ҳам мумкин эди, аммо бундай ҳолатда унинг фикру ҳаёли тўлиқ оиласи билан бўлар эди. У майдонга тушиш ва футбол ҳақида ўйламай қўяр эди. Футбол эса ҳар доим тўлиқ эътибор талаб қилади. Шу сабабли йўқ демадик ва кичик сумма ҳам ишлаб олдик.

- "Навбаҳор" "Оқ-тепа" клубидан ҳам бир футболчини ўз сафига қўшиб олди. Кубокда эса икки жамоа тўқнаш келган эди. Айнан ўша ўйиндан сўнг ушбу футболчига эътибор қаратдингизми?

- Йўқ, эътибор берсангиз, биз сўнгги вақтларда жуда кўп ёш футболчиларни жалб этяпмиз. Вилоят раҳбарияти жамоа қуришимизга уч йил вақт берган, биз эса секин-асталик билан ушбу вазифани бажаряпмиз. Талантли ёшлар кўп. Имкон қадар уларни сафимизга қўшиб олишга ҳаракат қиляпмиз. Таркибимизда ёши катта ва яқин келажакда мураббийликни бошлайдиган футболчилар бор. Ушбу футболчиларнинг ўрнини ёшлар тўлдириши керак бўлади.