Самвел Бабаян: "Бугун "Нефтчи" тарихини ёзаётган футболчиларни бир пайтлар ўзим катта қилганман"

- Ўйин ҳақида фикрингиз?

- Биринчи навбатда ўз мухлисларимиздан бугунги расво ўйинимиз учун узр сўрайман. Бунинг сабабларини таҳлил қиламиз. Голга қадар яхши ўйнаётгандик, ҳатто илк вазиятга биз эга бўлдик. Лекин ўтказиб юборилган биринчи голдан сўнг нима бўлганини билмайман. Чемпионга қарши баҳс олиб бордик, қийин ўйинни ўтказдик.

Шундай кучли жамоа барпо этгани учун Хайрулло Ҳайитбоевичга раҳмат айтаман. Жамоа ёшларни жалб этган ҳолда келажак ҳақида ўйлаяпти. Мағлубият сабабини нимада кўрсатиш мумкин? Буни таҳлил қиламиз. Биз бугун барча жабҳада мағлуб бўлдик ва буни тан оламиз. "Нефтчи"да ўйин яхши йўлга қўйилганлиги кўринди. Ўзимиз ҳақимизда гапирадиган бўлсам, рақобатбардош жамоани тузиш бирданига амалга ошиб қолмайди, бунинг учун "Нефтчи"га беш йил керак бўлди.

Бу мағлубият мен учун шахсан икки карра оғир, чунки бугун "Нефтчи" тарихини ёзаётган футболчиларни бир пайтлар ўзим "она сути бериб" катта қилганман. Бу айни факт. Бизнинг ҳам олдимизда худди Фарғонадаги каби чиройли футбол клуб тузиш вазифаси турибди ва бунинг учун ишлаяпмиз. Хатоларни тўғрилашга ҳаракат қиламиз. Нима қилиш кераклигини жуда яхши биламиз. Бизга вақт керак, фалон-фалон нарсалар лозим деб айтиш бу ерда ўтмаслигини ҳам биламиз. Менда беш йил вақт йўқ. Менга яхши жамоа тузиш учун жуда кам муддат берилган. Яна бир бор "Нефтчи"ни ғалаба билан табриклайман. Мағлубият сабабларини эса ўрганиб чиқамиз.

- Биринчи турда "Андижон" жуда чиройли ўйнади. "Сўғдиёна" дарвозасига жавобсиз тўртта гол урилди. Аммо иккинчи-учинчи турларда мағлубият содир бўлди. Бу эса кўпчиликни ҳайрон қолдиряпти. Кейинги турларда яна олдинга ҳаракат бўладими?

- "Сўғдиёна" билан ҳақиқатан яхши ўйин бўлди. Мавсумнинг очилиш ўйини, чиройли ғалаба ва мухлислар хурсандлиги. Ҳаммаси яхши кетаётган пайтда омад қушини қўйиб юбормаслик лозим. Очиғини айтаман, "Қизилқум" билан баҳсда мағлубиятга лойиқ эмасдик. Иккита зарба иккита голга айланди. Лекин футболда шунақаси ҳам учраб туради. Юқорида айтиб ўтганимдек, биз ҳар бир ўйинимизни таҳлил қиламиз. Андижон вилоят ҳокими ва андижонлик мухлислар кучли жамоа кўришга ҳақли.

- Тақвим борасида фикрингиз қандай? Уйдаги ғалабадан сўнг икки бор сафарда ўйнаб, ҳар иккаласида мағлуб бўлдингиз. Натижада олти очко бой берилди. 

- Ҳаммасини таҳлил қиламиз. Қисқа вақтимиз бор ва ҳаммасига улгуришимиз керак. Гап бизнинг сафарда тўп тепганимизда эмас, балки ўйин сифати борасида. Вертикал, прессинг футбол фалсафамизга тўғри келади ва шуни йўлга қўйиш устида иш олиб боряпмиз. Лекин бундай футболни фақат эпизодларда намоён эта оляпмиз. Биз ҳатто ўйиннинг ярмини ҳам назорат қила олмаяпмиз. Бугун ҳам фақат голга қадар нимадир қилишга уриндик, голдан сўнг ҳаммаси барбод бўлди. Буни сафардаги ўйин билан боғлиқ демаган бўлардим, бу бизнинг хатолар билан боғлиқ. Вазият яратишга келсак, бизда ижрочилар бор, бироқ ҳозирча ҳаммаси биз ўйлагандек чиқмаяпти.

- Черан билан Ашортиа анча эрта алмаштирилди. Уларда жароҳат юзага келдими ё бошқа сабаб борми?

- Ниманидир ўзгартириш керак эди, ўйинга тезлик ва агрессивлик қўшишимиз керак эди, вертикал футбол намойиш этишимиз лозим эди. Аммо бу нарса амалга ошмади. Шу боис ўйинчиларни алмаштиришга қарор қилдик. Азиз Турғунбоев жароҳатдан сўнг қайтди. Хумоюн Иминов қишки йиғинда яхши таассурот қолдирди, шу боис бошқаларга имкон беришни лозим топдик. Нимадир ўхшади, нимадир йўқ. Аслини олганда ҳеч нима ўхшамади. Тезкор ҳужумлар ҳам кўринмади.

- Остон Ўрунов жамоага қўшилиши қанчалик рост?

- Ҳозирча бу борада аниқ гап айта олмайман. Агар шундай бўлиб чиқса, Остон "Андижон"га келади деб умид қиламан. Унинг келиши ҳам ўзи, ҳам жамоа учун яхши бўлади. Жаҳон чемпионати олдидан футболчининг ўзи ҳам ўйин амалиёти тўплаб олади.

- Ўзбек футболининг тажрибали мутахассиси сифатида 15 март куни "Бобур Арена"да бўлиб ўтадиган "Пахтакор" ва "Нефтчи" ўртасидаги Суперкубок ўйини олдидан фикрингиз қандай? Негаки ўз вақтида ҳар икки клубда ишлагансиз ва бу жамоалар сизга бегона эмас.

- "Нефтчи"да мен ҳали ишламаганман.

- Юрий Саркисянга пайтида ёрдам бергансиз.

- Йўқ, адашяпсиз. Гап-сўзлар бўлганди, лекин Фарғонада ишламаганман. Ким билсин, футболда кейинроқ ҳар нарса рўй бериши мумкин. Шуни айтишим мумкин, Суперкубокда Ўзбекистоннинг ҳозирги энг кучли икки жамоаси тўқнаш келади ва қизиқ ўйин бўлади деб ўйлайман. Кучлилар ғалаба қозонсин. "Пахтакор"да кўп йил ишладим ва бу клуб менга бегона эмас. "Нефтчи" ҳақида гапирадиган бўлсам, ўз пайтида мен тарбиялаган ёшларнинг кўпчилиги ҳозир шу жамоада ўйнаяпти.

- "Нефтчи" ғалабасида Исмоиловнинг эффекти қай даражада деб ҳисоблайсиз? Статистика шуни кўрсатяптики, Исмоиловга қарши ўйинларда сизга осон бўлмаган.

- Тўғриси тушунмаяпман. Мураббий Исмоиловни айтяпсизми ёки ўйинчи Исмоиловними?

- Мураббий Исмоиловни. У "Турон"да пайтида бир марта сизни мағлуб этган ва бир марта дуранг ўйнаган. Ўшанда "Навбаҳор" бош мураббийи эдингиз. 

- Негадир сизнинг статистикангиз қулоққа ғалати эшитиляпти. Адамасам, биз "Турон"ни ютганмиз. Майли саволга объектив ёндашадиган бўлсак, "Нефтчи"нинг ғалабалари асосий сабабчиси - Хайрулло Ҳайитбоевич Бозоров. Бу бор гап. Бу ерда яхши футболчилар жам бўлган ва жамоани ким бошқаришининг фарқи йўқ. Хайрулло Ҳайитбоевичнинг олти йиллик меҳнати самараси бу. Мен кетганимдан сўнг "Нефтчи" "Навбаҳор"дан футболчиларни таклиф қилиб тўғри йўл тутди. Асосий сабаб вилоят ҳокимининг футболга бўлган қизиқишида ва "Нефтчи"га бефарқ эмаслигида. Ҳозирги "Нефтчи" ёшларни жалб этган ҳолда келажак жамоаси қуряпти.

- Сизнинг фикрингизча, бу йил чемпион бўла оладиган топ учта жамоа қайси?

- Тахмин қилишни ёқтирмайман. Ҳали ҳаммаси олдинда. Мен фақат ўз жамоам ҳақида гапиришни хоҳлайман. Андижон вилояти ҳокими таклифига кўра, клубга келдим ва яхши жамоа тузиш устида иш олиб боряпмиз. Вазият қандай бўлмасин, мақсад ўзгармайди ва кун тартибидан олиб ташланмайди. Андижонда ҳамма нарса бор, ҳаммаси футбол ривожи учун тайёр, фақат озгина вақт керак. Биз ҳам кучлилар орасида бўлиш учун бор кучни иш соламиз.