"Нефтчи" "Истиқлол" стадионини трансляция учун интеграциялашган кабеллаштириш юзасидан биринчилардан бўлиб шартнома имзолади

Стадиондаги мавжуд барча камера платформаларини SMPTE 311:2009 стандартига мос келадиган гибрид электр ва оптик кабеллар билан таъминлаш ва уланишларни ягона патчроом орқали марказлаштириш тизими трансляция сифатини яхшилашда муҳим омиллардан бири ҳисобланади. 

Ўзбекистон Республикаси Президентининг 2025 йил 21 августдаги “Ўзбекистонда футбол соҳасини рақамлаштириш ва оммавийлигини ошириш чора-тадбирлари тўғрисида”ги 262-сонли қарори асосида, эндиликда Суперлига стадионларида алоҳида VAR бошқарув хонаси ташкил этилмоқда. Ассоциация ва Лига аввалроқ буни Термиз ва Хоразм стадионларида синовдан ўтказган бўлиб, 2026 йилги мавсумдан эътиборан барча стадионлар Миллий футбол маркази билан бевосита боғланиши режалаштирилган. Шунинг баробарида, трансляциялар сифатини яхшилаш ва бу билан VAR маркази учун сифатли тасвирларни узатишга эришиш учун Суперлига стадионларида интеграциялашган кабеллаштириш тизими ишга тушиши кўзда тутилган.  

Кўчма телевизион стансиялар ФИФА ва ОФК талабларига тўлиқ мос ҳолда фаолият олиб боришини мувофиқлаштириш учун Президент қарори асосида техник талаб ишлаб чиқилган бўлиб, айни вақтда футбол клублари стадионларни унга мослаштириш масаласида тегишли компаниялар билан музокара олиб бормоқда. 

Фарғона вилояти ҳокими Хайрулла Бозоров ташаббуси билан "Истиқлол" стадионида интеграциялашган кабеллаштириш тизимини жорий қилиш бўйича бугун тегишли компания билан шартнома имзоланди. Шу тариқа, фарғоналиклар Суперлига клублари орасида мазкур талабни бажариш йўлида амалий қадам қўйган илк жамоага айланди. Маълумки, жорий мавсум "Нефтчи" ОФК Чемпионлар лигаси Элит мусобақасида мамлакат шарафини ҳимоя қилади. Шундан келиб чиққан ҳолда Фарғонада "Истиқлол" стадионини халқаро мусобақаларга мослаштириш ишлари олиб борилмоқда. 

"Нефтчи" клуби 2025 йилги мавсум чемпионлигини қўлга киритган кунда "Истиқлол" стадиони йилнинг энг яхши стадиони совринини қабул қилиб олганди. Шундан кейин ҳам стадионни замонавий талабларга мослаштириш устида иш олиб борилаётгани Лига томонидан эътироф этилади.