Камолиддин Тожиев: "Шўртан" 10 киши бўлиб ҳимоялангани бизга қийинчилик туғдирди"

- Ўйин ҳақида фикрингиз?

- Баҳс биз учун қийин кечди. "Шўртан" ҳар иккала таймда бизга қарши 10 киши бўлиб ҳимояланди. Ўтган тур майдонда 10 киши қолиб кўп куч йўқотгандик. Бугун шунинг таъсири ҳам билинди. Афсуски, ғалаба қозона олмадик.

- "Пахтакор" бу ўйинга кўтаринки кайфиятда етиб келди. Аввалги турларда "Андижон"га олтита гол урилди, "Нефтчи" мағлуб этилди. Лекин бугун "Шўртан"нинг охирги ўринда бораётгани футболчиларга таъсир кўрсатдими?

- Руҳий таъсир ҳам бўлиши мумкин. Ўтган тур кўп куч йўқотдик, бугун эса рақиб 10 нафар футболчи билан ҳимоялангани бизга қийинчилик туғдирди. Қолаверса вазиятлардан фойдалана олмадик.

- Захирадан тушган футболчилар ўйинга қанчалик таъсир қила олди?

- Футболчиларимиз толиқиб қолгани учун захирадан янги кучларни майдонга туширдик. Лекин барибир 10 киши бўлиб ҳимояланадиган жамоага қарши баҳс олиб бориш қийин кечади. Бўш ҳудудларни топиш ҳам осон эмас.

- Натижадан қониқдингизми?

- Ғузорга ютуқ учун келгандик. Лекин бир очко билан қайтяпмиз. Бор гап шу.

- Август ойи охирларида Тимур Кападзенинг "Пахтакор"га бош мураббий бўлиши мумкинлиги ҳақида гаплар янгради. Шундан сўнг жамоада нима ўзгарди ёки нима рўй берди? 

- Ҳеч нарса рўй бермади ва ҳеч нима ўзгаргани йўқ. Бизда ҳамма ўз ишини бажаришда давом этяпти.

- Сизнингча, бугун "Шўртан" таркибида энг яхши футболчи ким бўлди?

- Дониёр Нарзуллаев.