Камолиддин Тожиев: "Биринчи таймни тўлиқ жамоамиз устунлигида ўтказдик"

- Ўйин ҳақида фикрингиз?

- Учрашувни яхши бошладик ва 5-дақиқадаёқ гол уришга эришдик. Умуман олганда биринчи тайм тўлиқ жамоамиз устунлигида ўтди. Негадир иккинчи бўлимнинг дастлабки 20 дақиқасида ўзимизни кўрсата олмадик. Кейин эса яна ўзимизга келиб тўртинчи тўпни киритиб ғалабага эришдик.

- Иккинчи бўлимда ўтказилган иккита гол ҳақида нима дея оласиз? Жамоа ухлаб қолгандек туюлмадими?

- Тўғри, озгина шундай бўлди. Йигитлар сал хотиржамликка берилди. Ваҳоланки, танаффус пайтида ҳали ўйинни ютмадик, бўшашманглар деб айтгандик.

- "Пахтакор" яқинда Кубок финалида ўйнади, кўп куч йўқотди ва жисмоний жиҳатдан "Бунёдкор" яхшироқ ҳолатда деб тахмин қилгандик. Аммо жамоангиз биринчи таймни зўр ўтказди, ҳисоб ҳатто 5:0 бўлиши мумкин эди. Саволим: футболчи алмаштиришлар кеч амалга ошмадими?

- Алмаштиришларни кеч қилдик деб ўйламайман. Ўтган ўйиндан кейин таркибда озроқ ротацияни амалга оширдик. Ким кўпроқ ўйнаган бўлса дам бердик. Айтганимдек, иккинчи таймнинг 20 дақиқаси "Бунёдкор" устунлигида кечди. Биз қанотларни янгилашимиз керак эди, шу боис захирадан қанот футболчиларини туширдик.

- Чемпионлик пойгаси ҳақида гапириб ўтсангиз.

- Ҳар ўйиндан кейин бир гапни такрорлаб келяпмиз, яъни "Пахтакор" охиригача курашади. Ўзимизнинг очколарни йиғиб олсак уёғи нима бўлишини вақт кўрсатади.

- Ҳожиакбар Алижонов билан Игорь Сергеев бугун асосий таркибда ўйнади. Негадир Сергеевда фаоллик кўзга ташланмади. Ҳожиакбар эса ўзини зўр кўрсатди. Кейинги учта ўйинда ҳам Ҳожиакбар асосий таркибда тушадими?

- "Хоразм" билан кечган баҳсда Ҳожиакбарга дам бергандик. Кейин у Кубок финалида майдонга тушди ва бугун ҳам тўлиқ ўйнади. Алижонов энг яхши футболчиларимиздан бири ва у буни бир нечта ўйиндан бери исботлаб келяпти. Ҳам клубда, ҳам терма жамоада ўзини кўрсата оляпти. Сергеев ҳақида гапирадиган бўлсак, унга битта имконият берилса гол урадиган ҳужумчи. Бугун у тўп киритмаган бўлса ҳам жамоага фойдаси тегди.

- "Насаф"нинг икки етакчиси "Пахтакор" билан келишиб бўлди деган гапни эшитдик, қолаверса Ратиньо ҳақида ҳам гап-сўзлар чиққан.

- Жамоамизда нима ўзгаришлар бўлишини қишда кўрасизлар.