Ҳужжатларни сохталаштириш билан боғлиқ ҳолат сабаб "Нефтчи" ходимларининг иши ЎФА қўмитасида кўриб чиқилади

Трансфернинг сўнгги кунида "Нефтчи" клуби 4 нафар футболчини рўйхатдан ўтказган бўлиб, кейинчалик аниқланишича, ундаги айрим ҳужжатлар сохталаштирилган бўлган.

ПФЛ мутахассисларини "Нефтчи" клубига "Цементчи" жамоасидан келиб қўшилган футболчиларга тегишли айрим ҳужжатлар шубҳалантирган. Кейинчалик мазкур масалада ўрганишлар олиб борилди ва айрим жиҳатлар қайта текшириб чиқилди. Шундан сўнг ПФЛ Ассоциациянинг махсус инспекциясига мурожаат қилиб, мазкур ишни тўлиқ ўрганиб чиқишни сўради.

Ўтган давр давомида махсус инспекция тўпланган барча маълумотларни ўрганиб, "Нефтчи" ва "Цементчи" вакиллари билан суҳбатлар ўтказди ҳамда масалага ойдинлик киритди. "Цементчи" таркибида рўйхатдан ўтган 4 футболчининг шартномаси якунига етмаган бўлса-да, айни вақтда "Нефтчи" клубида фаолият олиб бораётган ходимлар 25 февраль куни Лигага юкланиши лозим бўлган ҳужжатларни сохталаштирган.  

Регламентнинг бузилиши ҳолатлари аниқланганидан келиб чиқиб, айбдор шахслар ва клубга нисбатан санкция қўллаш учун ушбу иш ЎФА тегишли қўмитасига оширилди. Қўмита қарор қабул қилгач, бу ҳақда батафсил маълумот берилади.