Cергей Токов: "Жамоани кучайтира оладиган маҳаллий футболчилар қолмади"

"Ўйин шиддатли бўлди. Биринчи бўлимни тўлиқ ютқаздик. Балки майдон ҳолати таъсир қилгандир. Иккинчи бўлимда эса бироз қувноқ ўйин намойиш этдик, иккинчи голни уришимиз ҳам мумкин эди ва гол ўтказиб юбориш хавфи ҳам бўлди. Назаримда адолатли натижа бўлди. Икки жамоа ҳам курашди", — деди Сергей Токов учрашувдан сўнг.

- Бугун "Бухоро"га рақиб сифатида қандай баҳо берасиз ва бухороликларнинг қайси жиҳати сизнинг жамоангизга қийинчилик туғдирди?

- "Сурхон"да ишлаганимда ҳам "Бухоро" тўқнаш келганман. Хомяков у вақти "Андижон"да ишлар эди. Жамоа жуда яхши ташкиллашган, бўйдор ва жангчи жамоа. Бундай жамоага қарши ўйнаш қийин, аммо жуда қизиқарли. Рақиб қанчалик жиддий бўлса, ғалаба шунчалик ширин бўлади.

- Ҳакамлик борасидаги фикрингиз қандай?

- Ҳиссиётлар ҳар доим бўлади. Мен ҳакамларга баҳо бера олмайман. Биз мураббийлар ҳиссиётга берилиб кетамиз. Ҳакам кўпгина вазиятларга курашга имконият берди. Футбол ўзгариб бормоқда, буни биласиз. Мухлисларимизга ҳам раҳмат.

- "Хоразм"нинг ўйини легионерларга боғланиб қолгандек. Маҳаллий футболчилар ҳам ўзини кўрсатадими?

- Биз фақат легионерлар деган тушунча йўқ. Мен учун ҳар бир футболчи тенг. Биз тактикамиздан келиб чиқиб футболчиларни танлаймиз. Таркибимизда 6та легионерлар борлигининг сабаби шундаки, ҳозирги кунда жамоани ҳақиқатдан ҳам кучайтира оладиган маҳаллий футболчилар қолмади. Суперлигада клублар сони кўпайди, Про Лигада ҳам 3-4та ўз олдига жиддий мақсадлар қўймоқда. Яхши футболчиларга талаб жуда катта. Ойликлар баланд ва кўпгина футболчилар хорижда ўйнамоқда. Бозоримизда сифатли ва яхши футболчиларни топиш жуда қийин бўлиб қолди. Барча футболчилар банд.