Азамат Абдураимов: "Раҳбарият ва мухлислар ишончини оқлаганимиздан хурсандмиз"

Биринчилик баҳсларининг 13-турида андижонликлар “Шердор” жамоасини қабул қилиб 5:1 ҳисобида ғалаба қозонишди. Ушбу ғалаба Азамат Абдураимов шогирдларига олий лига йўлланмасини тақдим қилди. “Андижон” олий лига масаласини ҳал қилгач, жамоа устози ўз фикрларини билдирди.

"Аввало шуни айтишим керакки, клуб мутасаддилари ва мухлислари йил бошида бизга ишонч билдиришганди. Мана шу ишончни оқлаганимиздан жуда хурсандмиз. Бугун “Шердор” жамоаси устидан зафар қучиб олий лига йўлланмасини муддатидан олдин ҳал этдик. Албатта, бу йил давомида қилган меҳнатларимиз самараси бўлди. Қизиғи, 2013 йилнинг 13 октябри ва 13-тур учрашувида олдимизга қўйилган вазифани бажардик. “Шердор”га қарши баҳсда шогирдларим жуда яхши ўйин кўрсатиб, вазифани бажариш учун астойдил ҳаракат қилишди. Ишқибозлар бугун бир-биридан чиройли голларга гувоҳ бўлдилар. Асосийси, бугун масалани муддатидан олдин ҳал этиб мухлисларимизга олий лига йўлланмасини туҳфа этдик", - дейди Азамат Абдураимов.