Александр Хомяков: “Негадир ўз ўйинимизни кўрсата олмаяпмиз”

Баҳс якунига етгач, “газчилар” устози Александр Хомяковнинг фикрлари билан қизиқдик.

- Александр Андреевич, аввало ўйин ҳақида нима дея оласиз?
- Ўйин биз учун оғир кечди. Негадир машғулотларда ишлаб чиқилган усулларни ўйин пайтида қўллай олмаяпмиз. Гарчи йирик ҳисобда ғалаба қозонган бўлсак-да, кўрсатган ўйинимиз чиройли чиқди дея олмайман.

- 3:0 ҳисобидаги ғалаба жамоалар орасидаги фарқни кўрсатиб турибдими?
- Бундай демаган бўлардим. Сабаби ҳозир барча жамоалар футбол ўйнашни билишади. Йирик ҳисобдаги ғалаба эса асосан вазиятлардан унумли фойдаланганимиз учун юзага келди. Лекин ўйин томонлама катта устунликка эришдик деб айтолмайман. Биз негадир ўз ўйинимизни кўрсатишни тўхтатиб қўйдик. Қолаверса, учта гол уришдан ташқари тўртта яққол имкониятни кўкка совурдик.

- Рақиб сизда қандай таассурот қолдирди?
- Рақиб жамоанинг ҳаракат қилаётгани кўриниб турибди. Улар ўйиндан завқ олиш учун, биз эса очколарни қўлга киритиш учун тўп сурдик.

- Иккинчи босқич ўйинлари қийин кечяпти деб ўйлайсизми?
- Бу ерда 16та энг кучли жамоа йиғилган деса бўлади. Лекин шунга қарамай, унчалик қийналаётганимиз йўқ. “Оқтепа”га ўз айбимиз билан ютқаздик. Лекин рақибни биздан кучли эди дея олмайман.

- Жамоага янги қўшилган Ойбек Полвонов ҳақида фикрингиз?
- У бизнинг таркибга иккинчи босқич олдидан келиб қўшилди. Ҳаракатлари чакки эмас. Жамоадошлари билан қанча тез чиқишиб кетса, ўйини шунча яхшиланади деб ўйлайман.