Янгича офсайд қоидаси Жаҳон чемпионатигача тасдиқланиши ва амалиётга татбиқ қилиниши мумкин

"Арсенал" собиқ бош мураббийи, ҳозирда ФИФАнинг футболни глобал ривожлантириш бўлими раҳбари лавозимида ишлаётган Арсен Венгер қуйидаги ўзгаришни таклиф этган эди: агар гол уриш мумкин бўлган тана қисмларидан бири (исталган қисми) охирги ҳимоячи билан бир чизиқда ёки унинг орқасида бўлса, гарчи қолган қисмлари бу чизиқдан ташқарида бўлса ҳам, ўйинчи офсайдда ҳисобланмайди. Ўйиндан ташқари ҳолат фақат ўйинчининг бутун танаси рақиб дарвозаси чизиғига тўп ва рақибнинг охирги ҳимоячисига нисбатан яқинроқ бўлгандагина қайд этилади.

Испаниялик собиқ ҳакам ва Cadena SER нашрининг ҳакамлик бўйича эксперти Эдуардо Итурральде Гонсалеснинг айтишича, Венгер номидаги бу тузатиш ноябрь ойида таҳлил қилинади ва футбол қоидаларини тартибга солувчи Халқаро футбол ассоциациялари кенгаши (IFAB) томонидан маъқулланиш эҳтимоли юқори.

IFAB аъзолари (23 нафар ўйинчи ва 11 нафар ҳакам) томонидан кўриб чиқилгандан сўнг, қоидани ўзгартириш масаласи тасдиқлаш учун овозга қўйилади. Овоз бериш 1 март куни бўлиб ўтиши кутилмоқда.

Итурральденинг таъкидлашича, агар қоида тасдиқланса, у 2026 йилда кучга киради - эҳтимол, АҚШ, Канада ва Мексикада ўтказиладиган жаҳон чемпионатидан бошлаб тадбиқ этилади.