Воҳид Холбоев "Нурафшон"даги молиявий ҳолат борасида маълумот берди

"Ўйинда ғалаба қозонишимиз аниқ эди. Мурод Ражабов жароҳат олгани сабабли ўйинда қатнашмади. Бироқ барибир кучли ўйин кўрсатдик. Кўп жамоалар ўз майдонида ҳужумкор ўйин кўрсатишга ҳаракат қилади. Шу жумладан биз ҳам ўз мезбонлигимиздаги ўйинда асосий эътиборни ҳужумга беришга интиламиз.

Жамоадаги молиявий ҳолат яхши томонга ўзгарган. Ҳар ҳолда футболчилар биздан маошларини сўрашмаяпти. Шу боисдан улардан талаб қилиш ҳам осон бўлмоқда. Жамоанинг ички муҳити ҳам ижобий томонда. Худо хоҳласа, айни дамдаги ўрнимизни сақлаб қолиб, ўтиш ўйинларида яхши томонларимизни кўрсатиб, Суперлигага чиқмоқчимиз.

Фарруҳ Шотурсуновда ҳам жароҳат бор эди. У анча вақтдан буён тўлиқ ўйинда қатнашмаяпти. Бугун ҳам у ўз жароҳати сабабли ўйиннинг сўнгги дақиқаларигача ўйнай олмади.

Бухорода ўтган ўйинда ҳам шундай ўйин кўрсатгандик. Ўшанда ҳам ҳужумкор ўйин кўрсатдик. Бироқ сўнгги дақиқаларда гол ўтказиб юбориб, ғалабани қўлдан чиқардик. Нима ҳам дердим, хатолар бор. Бу футболнинг бир бўлаги. Ҳеч ким хато қилмаса гол ҳам бўлмайди", - деди Воҳид Холбоев.