Виктор Карпенко: "Ўзбекистон майдонга ҳужумчи билан тушган ўйиндагина ишончли ғалабага эришди"

Олдинда Қатарга билан қарама-қаршилик кутмоқда. Умуман олиб қараганда чорак финалда Ўзбекистон учун ўз даражасидаги рақиб тушди. Ҳар холда шу пайтгача Қатар билан ўйинларда катта муаммоларга дуч келмаганмиз. Ўзбекистон терма жамоаси собиқ футболчиси Виктор Карпенко ҳам бу борадаги фикрларини билдирди. 

- Гуруҳдаги биринчи ва куни кеча бўлиб ўтган Таиланд билан ўйинни солиштирганда, терма жамоамиз ўйиндан-ўйинга қўшиб бормоқда. Ишончли ҳаракат қилмоқда. Гуруҳ босқичида мағлубиятга учраганимиз йўқ. Нимчорак финалдаги рақибимиз эса дарвозасидан бирортга гол ўтказиб юбормаган Таиланд эди. Ўзбекистон бу жамоага 2та гол урди ва чорак финалга чиқди.  

- Терма жамоамизнинг барча учрашувларини кузата туриб шуни айтишим мумкинки, ҳужумчисиз ҳаракат қилганда эмас, форвард билан янада яхшироқ ўйнашимизга гувоҳ бўлдим. Майдонда ҳужумчи бўлган учрашувда биз ишончли ғалабага эришдик. Шомуродов йўқ, Сергеев жароҳат олган. Майдонда мен Бобир Абдихолиқовни кўришни истардим. Ўйлайманки, мураббий тўғри қарор қабул қилади. 

- Ҳар бир Осиё Кубогида мезбонларда имконият кўпроқ бўлади. Улар фаворит дея қаралади. Қатар ўз майдонидаги ўйинларда ишончли ўйин кўрсатиб, чорак финалга етиб келди. Улар ўтган Осиё Кубогидаги муваффақиятни яна такрорлашни исташлари табиий. Осон бўлмайди. Лекин футболда ҳамма нарса бўлиши мумкин. Барчаси майдонда ҳал қилиниши керак. Икки жамоа ҳам бир-бирига муносиб. Терма жамоамиз ўзининг кучли сифатларини кўрсатиб, ярим финалга йўлланма олади, деган умиддаман. 

- 2011 йилги Қатарга қарши баҳс мусобақанинг очилиш учрашуви бўлган. Ўйиндан олдин, учрашув атрофида ОАВ катта ажиотаж кўтаргани ёдимда. Улар турнирни ғалаба билан бошлашни истарди. Лекин биз ҳам бу турниргача узоқ вақт тайёргарлик кўрганмиз. Ўша оқшомда ғалаба бизники эди.