- Ўйин ҳақида фикрингиз?
- Гол ўтказганимиздан кейин ўзимизга келиб иккита гол уришга муваффақ бўлди. Бу яхши, лекин тўхтаб қолишимиз керак эмас. Тўғриси, негадир ғалати ўйнаяпмиз, баъзан ўз жамоамни таний олмаяпман. Биринчи таймда ҳаммасини тўғри бажаряпмиз, фақат охирги пас етишмаяпти. Рақиб эса биргина вазиятдан гол уриб кетяпти. Захирадан тушганлар ўйинни кучайтирди, бу билан йигитларни табриклайман. Омадсиз иштирокимизга қарамай, мухлислар стадионга келиб олқишлаб туришди ва ғалаба билан уларни ҳам табриклайман.
- Вадим Карленович, ғалаба муборак. Статистика шуни кўрсатяптики, сиз Суперлига (Олий лига)да 100та ўйинда ғалаба қозонган мураббий бўлдингиз. Ушбу статистика 2007 йилдан бери юритиб келинмоқда, балки ундан олдин ҳам кўп ўйинларни ютган бўлсангиз керак. Бугун эса 101- ғалаба бўлди. Умуман сиз рекордларга қандай қарайсиз ва "Динамо"ни яна юқори ўринларга кўтариш учун нима режа тузгансиз?
- Тўғриси, бу статистикани билмасдим. Биринчи марта эшитиб турибман. Ўйлашимча, ютган ўйинларим сони бундан ҳам кўп бўлса керак. Ўсишда давом этаман деб ўйлайман. Жамоа режаларига оид саволга келсак, ишлашда давом этяпмиз. Натижа ёмон бўлса мухлислар ҳам келмай қўйди. Қандай иш олиб бораётганимизни мухлислар кўплиги ё камлигидан билса бўлади. Ёмон ишлаяпмизми, демак улар ўйинга келмаяпти.
- Ўтган учрашувда муаммолар кўп бўлди, натижа ҳам ўхшамади. Бугунги ғалабадан кейин жамоа боши берк кўчадан чиқиб кетди деса бўладими?
- Шунга умид қиламиз. Бугун ҳам кўрдингиз, гол ўтказгандан кейин бироз ўзимизни йўқотиб қўйдик. Аммо куч топа олдик ва иккита гол билан жавоб бердик. Бунинг учун йигитларга раҳмат. Қийин вазиятни тўғрилаш осон бўлмади. "Насаф" билан баҳснинг охирги дақиқаларида тўп ўтказиб юборгандик. Кейин эса вақт етмай қолганди.
- Бу футболчи доим фаол бўлишга интилади. Жамоангиз иккинчи тўпни киритганида захирадан тушган барча ҳужумда иштирок этди. Миллий баскетбол уюшмасининг баскетбол мусобақасида 6-ўйинчига аталган махсус совғаси бор. Худди шундай совғани Хислат Халиловга ҳам бериш керак эмасмикин. Чунки захирадан қўшилганда жамоага кўп фойдаси тегяпти.
- Биз Халиловнинг кучли томонларини яхши биламиз. Агар ўзи қарши бўлмаса, марҳамат шундай совғани бериш керакдир.
- Бугун асосий таркибда ротацияга қўл урдингиз. Бу охирги ўйинлардаги натижа билан боғлиқми?
- Биз доим машғулот ўтказамиз ва навбатдаги учрашувга тайёргарлик кўрамиз. Машғулотда ким ўзини кўрсатса, шу футболчи асосий таркибда тушади. Олдинда ҳали баҳслар кўп. 12 апрель куни яна майдонга тушамиз. Менга тез-тез ўйинлар бўлаётгани ёқяпти, шундай давом этса ҳам майли.
