Вадим Абрамов: "Баъзи ўйинларимиз ижобий якун топганида ҳатто иккинчи ўринни олишимиз мумкин эди"

- Ўйин ҳақида фикрингиз?

- Афсуски, баъзи режаларимиз иш бермади. Мавсумни совриндорлар қаторида тугатиб қўйишни хоҳлагандик, бироқ тўртинчи ўринда якунлайдиган бўлдик. Баъзи ўйинлар ижобий якун топганида ҳатто иккинчи ўринни олишимиз ҳам мумкин эди. Бугунги баҳсга келадиган бўлсак, таркибимизда муаммолар бор эди. Шунга қарамай, охиригача кураш олиб боришгани учун йигитларга раҳмат айтаман. "Насаф"ни бронза медаллар билан табриклайман.

- Барибир "Динамо" тарих яратди дея оламиз. Мухлисларнинг фикрича, тўртинчи ўрин ҳам ёмон натижа эмас ва кўпчилик Абрамов Самарқандда яхши жамоа тузди демоқда.

- Мен кўп бора айтганман: биз мухлислар учун ўйнаймиз. Қайсидир ўйинларда хурсанд қилдик, қайсидир беллашувларда бунинг акси бўлди, лекин доим мухлисларни ўйлаб ҳаракат қилдик. Айтиб ўтганимдек, чемпионатни юқори ўринларда тугатишимиз мумкин эди.

- Футболчилар бир неча ойдан бери маош олмаяпти, машғулот ўтказиш учун яхши майдон йўқ деб эшитдик. Кўпчиликнинг шартномаси тугаяпти, сизда ҳам вариантлар борлигидан хабаримиз бор. 

- Бу ўринда мен нима дейишим мумкин? Ўзингиз ҳамма гапни айтиб бўлдингиз. Мен фақат савол ва жавоб учун раҳмат дея оламан. Шартномалар ҳақида ҳам бирор гап айта олмайман, чунки буни клуб ҳал қилади. Кимда қанақа таклифлар бор, кўрамиз. Агар Самарқандга жамоа керак бўлса, клуб футболчилар шартномасини ўрганиб чиқиши керак бўлади.

- Мавсумдаги энг қийин ва эсда қолари ўйинлар қайси бўлди?

- Биз кўп ўйинларда очко йўқотдик. Ваҳоланки,ютишимиз мумкин эди. "Қўқон-1912" билан баҳслар анча сермазмун ўтди дея оламан. Мавсум давомида жароҳатлар кўп панд берди. Мана ҳозир ҳам жароҳат сабаб бир нечта футболчимиз майдонга туша олмади. Мен жамоа бош мураббийи сифатида ушбу мавсумдаги иштирокимиз учун ҳаммага раҳмат айтаман.

- Кейинги режалар нималардан иборат?

- Биринчи навбатда клуб ҳамма билан ҳисоб-китоб қилиши керак бўлади. Ундан кейин режа устида бош қотирамиз. Албатта, турли режалар бор ва тез орада бу борада иш олиб борамиз.