Вадим Абрамов: "Тўрт ой ўтдики, маош олмадик. Шак-шубҳасиз бу оғир"

- Биринчи бўлимни яхши бошладик ва омадимиз келиб, иккита гол уриб олдик. Ўйинни биринчи таймнинг ўзида ҳам тугатиб қўйишимиз мумкин эди. Иккинчи бўлимда эса ўйинимиз чиқмади. Гол ўтказиб юборганимиздан кейин эса валидол ўйин бўлди. Омадимиз келиб, ғалабага эришдик. "Бунёдкор"га навбатдаги учрашувларда омад тилайман. Биз эса кейинги ўйинларга яхшироқ тайёрланишимиз керак. Чунки иккинчи бўлимдаги ўйинимиз бўлса, кўплаб муаммоларга йўлиқишимиз аниқ. 

- Иккинчи бўлимда жамоага нима бўлди? "Бунёдкор" ташаббусни қўлига олдими ёки "Динамо" футболчилари руҳан натижа учун ўйнашга ҳаракат қилдими?

- Йўқ. Ўзгаришлар муваффақиятсиз бўлди. Бу менинг айбим, ўзгаришларни топа олмадик. Захирадан ўйинга қўшилган футболчилар орқали биз бошқачароқ ўйнашимиз керак эди. Марказда ёмон ўйнай бошлаганимиздан кейин муаммолар кўпайди. 

- "Динамо" мавсумни ўтган йилги темп билан бошлади. Биринчи ўйиндаги натижани кутилмаган десак бўладими?

- Бундай бўлишини ким ҳам тахмин қилибди. Биринчи ўйинни ҳам яхши бошладик ва гол урдик. Кейин эса йўқ жойдан пенальти юзага келди. Кўп ўтмай стандартдан иккинчи голни қўйиб юбордик. Шундан сўнг шошилиб ўйнадик ва нотўғри ҳаракатлар эвазига гол ура олмадик. Бизда реализация муаммо. Кўрдингиз, биринчи бўлимда кўплаб вазиятлар бўлди, лекин ушбу жиҳат бизда оқсади. Умуман олганда дастлабки икки тур доимо тахмин қилиб бўлмас бўлиб ўтади. Йигитлар ҳали яхши ҳолатда эмас. Бу эса яққол кўриниб турибди.

- Иккинчи бўлим бошида Азизбек Амоновнинг алмаштирилиши сабаби нимада эди?

- У бироз жароҳат олди.

- Амонов ўтган мавсумнинг дастлабки қисмини "Бунёдкор" сафига ўтказган ва бугун айнан шу сабабли бўлса керак, катта иштиёқ билан ўйнади. Сиз эса майдон четида унга бир неча марта эътироз билдирдингиз.

- У шунчаки пас бериши керак бўлган жойда тўпни ўзида кўп ушлаб қолди. У "Бунёдкор"га қарши муваффақиятли ўйнади. Агарда у ҳар бир ўйинда шундай голлар уришда давом этса, яхши бўларди. Яхши футболчи, иқтидор. Унга умид билдиряпмиз.

- Жамоада муаммо фақатгина реализацияда эмас. Эшитишимизча, футболчилар бир неча ойдан буён маош олишмаётган экан. Бу орқали футболчиларни қай тариқа юқори ўринлар учун руҳлантира оласиз? Барчанинг ўз оиласи бор. Уларни боқиши, хўжалик ва кундалик таъминлаши керак.

- Гапингиз тўғри. Футболчиларнинг ҳам оиласи бор. Тўрт ой ўтдики, маош олмадик. Шак-шубҳасиз бу оғир. Барчасини тўғри тушуниб турибман. Раҳбарият бу муаммони ҳал қилиши керак. Умид қиляпмиз.