U-19 чемпионатининг ўзбек футболига фойдаси тегадими?

Энг биринчи навбатда миллий чемпионатларимизда иштирок этаётган клублар жамоалари учун тайёр футболчиларни етказиб беради. Клублар қошида шакллантирилган U-19 ёшлар жамоаларида кашф этилган иқтидорлар вақти келиб асосий жамоа таркибига қўшилса, бунда трансферларга сарфланадиган маблағлар табиий холда тежаб қолинади. Ёки Суперлига клуби U-21 жамоасини янгитдан шакллантириб ўтирмайди, ўша U-19 жамоасига 3-4 нафар футболчини қўшган холда U-21 жамоасига айлантириб қўяди, вассалом.

Иккинчи навбатда эса биз ҳар трансферлар ойнаси очилган вақтда жамоасини ўзгартирадиган "келди-кетди" футболчилардан қутуламиз. Чунки, ёшлар жамоасида шаклланган тайёр кадр турганида ҳеч бир клуб ташқаридан фалон суммага келадиган футболчининг ёрдамига муҳтож бўлмайди.

Учинчи навбатдаги эҳтимол ҳам бор, ушбу чемпионат орқали биз бир клубга Ватан сифатида меҳр қўйган футболчиларни кашф этилишига сабабчи бўламиз. Мисол учун хатто ўз академиясига эга бўлмаган клуб ҳам U-16, U-19 жамоалари орқали бир неча нафар ёш футболчини тарбиялаб олиш имконига эга бўлади. Йиллар давомида бир жамоада ўйнаб, ош-тузини ичган футболчи учун ўша жамоа Ватанга айланади. Энди унинг учун жамоасининг мағлубияти номусга тенг бўлади, масалан 0:3 ҳисоби билан якунланган ўйиндан сўнг майдондан бамайлихотир чиқиб кетмайди, камида кўзида ёш қалқиб турган бўлади. Сўнги вақтларда айнан шу каби хислатларга эга бўлган футболчиларни Қаршининг "Насаф" клубида кўраяпман.

U-19 чемпионатлари Суперлига ва Про-лига клублари ўртасида ташкил этилаётгани яна бир айни муддао бўлаяпти. Бунда Про-лига вакили бўлган клуб қошида ташкил этилган U-19 жамоа футболчиси масалан "Пахтакор" ёки "Насаф" каби гранд клублар ёшлари билан ҳам ўйнаш имкониятига эга бўлаяпти. Қуйида келтирилган мусобақа жадвалига эътибор қаратсангиз Про-лига жамоаларининг ҳам натижалари чакки эмаслигига гувоҳ бўласиз.

Ҳаммаси яхши-ю, озроқ аммо, лекин, бироқ ҳам бор-да. U-19 ёшлар чемпионати бутун Республика бўйлаб бир мусобақа жадвали асосида ташкил этилаяпти. Бунда Урганчнинг "Хоразм" клуби ёшлари чемпионат доирасидаги ўйин учун Наманганнинг "Навбаҳор" клуби майдонига бориб-келишига тўғри келаяпти. Ўша машҳур қўшиқда айтилганидек, "Тошкентдан Хоразмгача 1100 километр" бўлса, унда Урганчдан водийгача бўлган масофани тасаввур қилаверинг. Шунингдек, йўлга сарфланадиган маблағдан ташқари меҳмонхона ва озиқ-овқат ҳаражатлари ҳам бор. Ўзингиз ўйлаб кўринг, бундай холат бюджети кичикроқ клубларга қийинчилик туғдирмайдими? 

U-19 чемпионатининг ташкил этилиши - сўнги йилларда ўзбек футболида эришилаётган ютуқлардан бири деб ўйлайман. Таклифим, келаси мавсумдан бошлаб ушбу чемпионат минтақаларга ажратилиб ўтказилиши керак. Албатта, аввалги каби Суперлига ва Про-лига клублари қошидаги жамоалар биргаликда. Менимча, бунга айни вақтда худудларда мавжуд бўлган жамоаларнинг сони етади.

Бекзод Толибов тайёрлади