Transfermarkt ва Championat.Asia Суперлигада июнь-июль ойининг энг яхшиларини аниқлашди

Овоз беришда Transfermarkt'нинг рус тилидаги версияси ходимлари ва “Championat.Asia” таҳририяти иштирок этди, эксперт сифатида Ўзбекистоннинг энг яхши футбол шарҳловчиларидан бири Мирзаҳаким Тўхтамирзаев иштирок этди. Овоз беришда 13 ва қолдирилган 8-тур натижалари инобатга олинди.

Александр Хомяков ойнинг энг яхши мураббийига айланди. Унинг қўл остида “Андижон” битта ғалабага эришди (“Бухоро” устидан), иккинчи учрашувда эса сафарда амалдаги мамлакат чемпиони – “Пахтакор”дан очко тортиб олишга муваффақ бўлди. Хомяков 62 фоиз, “Нефтчи” бош мураббийи Виталий Левченко (25 фоиз) иккинчи ўринни эгаллади.

Ўзбекистон чемпионатида ойнинг энг яхши футболчиси деб “Андижон” жамоаси шарафини ҳимоя қилган Рубин Хебай тан олинди. У иккита ўйинда иккита гол урди – “Бухоро” дарвозасига ғалаба ва “Пахтакор” билан ўйинда жамоасининг дуранг ўйнашига ёрдам берган гол. Умуман олганда, албаниялик форвард “Андижон” сафида барча турнирлар доирасидаги 15 учрашувда 14 та самарали ҳаракат (12 та гол ва 2 та голли узатма) амалга оширган. Унга респондентларнинг 70 фоизи овоз берди.