"Бутун жамоани ва мухлисларни табриклайман. Қийин ўйинда уч очкони қўлга киритдик. "Локомотив" тажрибали ва ёш ўйинчилар "микс" бўлиб жамланган жамоа. Биз керакли жойда босим қилиб гол урдик. Кейин эса "Локомотив" гол уришга ҳаракат қилди. Осон бўлмади, энди кейинги ўйинга тайёргарлик кўрамиз. Бу ўйинда натижа учун ўйнадик", - деди Тимур Кападзе.
- Ўз фикримни савол тариқасида бермоқчиман: "Навбаҳор" ва "Локомотив"нинг ўйин услуби бир-бирига ўхшаш: тўпни ушлаб туришни ва зарба беришни яхши кўради. Лекин "Локо"да асосан бир хил ўйинни кўряпмиз. "Навбаҳор"да эса "A", "B", "C" планлари бордек. Яъни, жамоа исталган ҳолатга мослаша олади. Саволим шундай: жамоанинг тактикаси қандай - тўпни ушлаб туришми ёки вазиятга мослашиш?
- Асосий услубимиз уч очкони қўлга киритиш. Керакли вақтда ҳимояланяпмиз. Керакли вақтда эса ҳужум қилиш керак. Майдон ҳолати яхши эмас эди. Бу икки жамоага ҳам халал берди. Шунинг учун тўпни рақибга бериб, кўпроқ тўпсиз ҳаракатландик. Ўйин бошида иккита гол уриб олганимиз яхши бўлди. Асосийси уч очко, ғалабани қандай қўлга киритганимиз эса сир бўлиб қолсин.
- "Локомотив"да бир неча мавсум давомида Йеличич қўл остида ўйнагансиз. Унинг қайси жиҳатларини ҳозирги кунда мураббийликда ишлатяпсиз?
- Мирко билан анчадан бери танишмиз. У "Пахтакор" жисмоний тайёргарлик бўйича мураббий бўлиб келган эди. Кейин эса терма жамоада ишлади. Жисмоний тайёргарлик бўйича мураббийдан, бош мураббийликка ўтди. "Локомотив"нинг бир нечта ўйинларини кўриб чиқдим. Жамоа кўп жиҳатлар устида ишлаган. Йеличичнинг имзоси кўриниб турибди. Ҳар бир мураббийдан бир нима ўрганаман. Мирко "Локо"ни илк маротаба чемпион қилди. Бу клуб унга бегона эмас. Ҳозирги таркибда йигитлар ҳам "Локомотив"да олдин ўйнашган. Миркодан ҳам керакли нарсаларни ўрганганман.
- "Навбаҳор" 2:0 ҳисобида олдинга ўтиб олганидан сўнг ўйинни ташлаб юборди деган фикрга қанчалик қўшиласиз? 20 дақиқадан сўнг "Локомотив" устунлик қила бошлади-ку...
- Шундай туюлган бўлиши мумкин. Биз яна тўпни назорат қилишимиз мумкин эди, аммо йигитлар бироз хотиржамликка берилишди. Майдон ҳолати ҳам тўпга доим эгалик қилиб туришга халал берди. Танаффусда йигитлар майдон сирпанчиқ бўлиб қолганини айтишди. "Локомотив"га "Олимпия" стадионида ўйинни ўтказиш таклифини берган эдик. Ҳисобда олдинга чиқиб олганимиздан сўнг "Локо" катта куч билан олдинга ўтишни бошлади. Биз эса қарши ҳужумларни рақибни жазолаш режасига ўтиб олдик. Қаердадир режамиз иш берди, қаердадир эса йўқ. Яна битта гол урсак, ҳаммаси тугарди. "Локомотив" ҳам яхши имкониятларга эга бўлди. Юсупов ва ҳимоячилар кетма-кетлик билан бизни қутқарди. Ҳисоб йигитларга хотиржамлик бергандир. Мен бундан бироз асабийлашдим. Иккинчи бўлимда тактик жиҳатдан ўзгариш қилдим.
- Танаффусда Алекс Фернандес ўрнига Дилшод Комиловни майдонга туширдингиз ва жамоа уч нафар марказий ҳимоячи билан ўйнашни бошлади. Бунга нима сабаб бўлди?
- "Локомотив" ҳужумга зўр берганидан сўнг қанотларда камчиликлар кузатилди. Олдинда эса етарлича прессинг қила олмадик. Алекс "эпизод"ли ўйнади деган бўлардим. Бундай майдонда курашувчан ўйин намойиш этиш керак эди. Шунинг учун Диёр ва Алексни захирага олдим. Қанотларни эса ёпдик. Қўшамиз десак, яна қўша олардик. Беш нафар ҳимоячи билан ўйнаганимизга қарамай, қарши ҳужумда гол уришимиз керак эди.
- Русланбек Жиянов март ойидаги йиғиндан тушиб қолди. Жияновнинг ҳозирги формасидан келиб чиқиб Каннаваронинг қарори тўғри бўлган деб ҳисоблаймизми?
- Биринчидан, МТЖда ҳар доим танлов катта. У кенгайтирилган рўйхатдан бўлган. Мураббийлар штаби олдида қийин танлов бор эди. Мавсум бошидаги ўйинларига қараб, иккиланишгандир. Сўнгги ўйинларда эса анча яхши ўйнаяпти. Энди навбатдаги йиғинга чақирилиши мумкиндир. Муҳими - футболчиларимиз соғ бўлиши. Терма жамоага чақирилиш насиб нарса. Ҳар бир даъвогар футболчи чақирув олишга муносиб. Сўнгги уч ўйинда анча ўзиб келиб олди. Дастлабки уч турдан сўнг унга саволларим кўп эди. Айниқса тўпсиз жабҳада. Ҳозир эса спорт формасини тиклаб олди.
