Суперлига клублари юзасидан ЎФА раҳбариятига мурожаат!

Ҳакамлик, келишилган ўйинлар ва ҳоказо юзасидан ЎФА амалга ошираётган ишлар таҳсинга лойиқ. Лекин шунга қарамасдан давлат томонидан молиялаштириладиган клублар ривожланиш йўлидан юриш ўрнига бошқарувдагиларнинг манфаатига хизмат қилиб келмоқда. Ҳеч бир Суперлига клуби ҳозирча замонавий тенденцияларга жавоб бериш тугул, уларга интилиш борасида ҳам мақтана олмайди. Мақсадсиз ўтказаётган мавсуми учун жавобгарлик ҳисси йўқ клубларимиз бундай муҳитга ўрганиб қолишган, афсуски.

Клублардаги бош директор лавозими қоғозда жарангли эшитилиши мумкин, лекин амалда Суперлига клубларида бош директор жамоага вазифа ёки талаб қўйишга қодир эмас. Сир эмаски, ўзбек футболида бош мураббийлар нафақат жамоа устидан ҳукмронлик қилади, балки клубга йўналтирилаётган пулларнинг тақсимотининг назоратини ҳам ўз қўлига олган. Бу эса ривожланмаётган клубларимизнинг тобора тубга қараб кетишига замин яратмоқда. Чунки бош мураббий учун асосий жамоадан бошқа бўғин йўқ ва қолганлар энг пастки даражада. Бу ҳам ўзбек футболидаги энг катта муаммоларимизнинг асосларидан бири.

Шу боисдан ҳам ЎФА раҳбариятидан ФИФА кунлари туфайли бўладиган танаффус пайтида Суперлига клубларининг хўжайинлари, таъсисчи ёки клуб президентлари иштирокида очиқ мулоқот шаклида журналистлар билан учрашув ташкил этиб беришларини сўраб қоламиз.

Нарзулла Сайдуллаев