Шуҳрат Тошпўлатов: "Станоевич май ойи охирида сафга қайтади"

Ўйин ҳақида

- Бугун энг муҳими бизга ғалаба зарур эди. Ўйин сифати кўнгилдагидек бўлмади, бироқ якунда ғалабага эришдик. Муддатидан аввал навбатдаги босқичга чиқдик. "Сурхон" бугун жуда яхши ўйин намойиш этди. Рақиб яхши ҳимояланди. Яратилган вазиятлардан бирида 11 метрлик жарима зарбасига эга бўлдик ва гол урдик. Ғалабадан албатта хурсандмиз.

- Бу йилги мақсадлар қандай?

- Ҳар йили мақсад бизда юқори. Ҳам ички чемпионатда, ҳам Ўзбекистон кубоги ўйинларда. Мусобақалар биз учун биринчи ёки иккинчи даражали ҳисобланмайди. Ҳар бир ўйинда максимал натижа учун майдонга чиқамиз.

- Биринчи бўлимда айрим футбролчиларга дам берилди. Бу "Навбаҳор" билан ўйинга куч сақлаш учунми?

- Шундай деса ҳам бўлади. Биз бугун ўйин амалиётисиз қолаётган футболчиларга ҳам имконият бердик.

- Марко Станоевич қачон сафга қайтади?

- У билан ўзим гаплашганим. Билишимча, май ойи охирида сафга қайтади.

- Муҳаммаджон Раҳимов ўз имкониятларидан фойдалана олмаяпти. Бунинг сабаби нимада?

- Биз ҳар бир футболчига имкон бераяпмиз. Раҳимов ҳам олдинда ўз ўйинлари билан мухлисларни хурсанд эта олади.

- Абдувоҳид Неъматов ўйин қайдномасига киритилмаганининг сабаби нима?

- Унда жароҳат йўқ. Бугун унга дам олиш учун имкон бердик.

- Биринчи бўлимлар зерикарли ўтаяпти. Иккинчи бўлимдаги фаоллик бу танланган режами?

- "Насаф" доим ҳужумкор ўйин намойиш этган. Ҳозир шу услуб иш бераётган бўлса, демак тўғри бўлаяпти.

- Иккинчи бўлимда бирданига 4 та ўзгариш. Бунга нима сабаб бўлди?

- Ўзгартирилган футболчилар ўйинни кучайтира олишди. Бугун бизга ғалаба зарур эди.

- "Навбаҳор" билан ўйинлардаги салбий натижаларга 7-май куни чек қўйиладими?

- Биз томонимиздан барча ҳаракатни амалга оширамиз. Ҳаммаси Аллоҳдан, биз ғалаба учун майдонга чиқамиз.