Шуҳрат Мақсудов: "Албатта, ўйинлар сони кўп бўлгани яхши, фақат жамоалар бунга лойиқ бўлиши керак"

- Ўйин ҳақида

- Аввало, "Бунёдкор" мухлисларини, ишчиларини ва айниқса, футболчиларини ғалаба билан чин кўнгилдан табриклайман. Йигитларга ташаккур айтаман. "Сурхон"га кейинги ўйинларда омад!

- Мавсум бошланишидан олдин "Бунёдкор"га ва сизга ишонмаган одамлар талайгина эди. Ҳозир 5-ўрин кафолатланди. Жамоа охирги турда 4-ўрин учун ҳам кураш олиб бориши мумкин. Мавсум бошида жамоада номинал ҳимоячилар йўқлиги ва таркибни ўзингиз хоҳлагандек шакллантира олмаганингиз ҳақида айтгандингиз. Жамоанинг мавсум давомидаги асосий ютуғи нимада бўлди?

- Энг муҳими, ўзимга ишонган эдим. Бундан ташқари, ёрдамчиларим ҳамда футболчиларга ишонардим. Улар ҳар бир ўйинда кучли эканликларини исботлашди. Ҳеч ким меҳнат қилишдан тўхтамади ва мана ижобий натижалар кела бошлади. Ҳомийларга ҳам ўзим ва футболчилар номидан миннатдорлик билдирмоқчиман.

- Аутсайдер жамоалар келаси мавсумда Суперлигада 16 та жамоа бўлиши тарафдори эканликлари ҳақида гап-сўзлар тарқалди. Бунга сизнинг шахсий муносабатингиз қандай?

- Бу нарсани масъуллар ўйлагани яхши. Менинг вазифам – футболчиларни ўйинга тайёрлаш. Бу нарса менинг ваколатимга кирмайди. Албатта, ўйинлар сони кўп бўлгани яхши, фақат жамоалар бунга лойиқ бўлиши керак. 3-4 турдан кейин сафар ўйинларига пул тополмаса, чемпионатга зиён келтиради. Шу боис бу масалани чуқурроқ ўйлаш лозим.