- Ўйин ҳақида
- Аввало, "Шўртан"ни ютуқ билан табриклайман. Жамоамиз йигитлари бор кучларини сарфлашди, бу учун раҳмат. Очиқ ўйин кўрсатдик. "Олимпик" билан баҳсда ҳимоявий ўйин кўрсатгандик. Очиқ футбол кўрсатганимиз боис рақиб бизни 3 та гол билан жазолади.
- Таркиб ёш футболчилардан тузилган. Бугун уларга жон-жаҳдингиз билан кўрсатма бердингиз. Жамоа раҳбарияти олдингизга қандайдир мақсад қўйганми?
- Йўқ. Бизда вазифа йўқ. Албатта, ҳар бир ўйинда ғалаба қозониш учун майдонга тушамиз. Жамоамиз 2005 йилда таваллуд топган футболчилардан иборат. Бу – футбол. Кимдир ютади, кимдир ютқазади. Бугун мағлуб бўлдик, демак, рақибнинг омади келди ва ғалабага эришди.
- Биринчи голда дарвизабонга кескин эътироз билдирдингиз. Ўша вазиятда ким айбдор эди?
- Ўйинда бутун жамоа ҳаракатланади. Кимнидир айблаш қийин. Футболда дарвозабон битта қарорга келдими, уни охиригача бажариши керак. У олдинга чиқди ва ортга қайтиб кетди. Биринчи тўп уники эди. У ҳужумчи бемалол зарба беришига йўл қўйиб берди.
- Биринчи таймнинг ўзида ўзгаришга қўл урдингиз, яъни ҳужумчи ўрнига ярим ҳимоячини майдонга туширдингиз. Бу ҳисоб йириклашиб кетмаслиги учун қилиндими?
- Ярим ҳимоячи ҳам, ҳужумчи ҳам 2005 йилда туғилган футболчилар, шунинг учун уларни тезроқ алмаштириш керак эди. Бунақа катта майдонга биз биринчи марта ўйнаяпмиз. Шунинг учун тез-тез ўзгариш қилиб туришим керак, ҳамма йигитларга имконият беришим керак. Улар профессионал футбол ҳавосидан нафас олиб кўришлари зарур.
- Бир ҳолат эътиборимизни тортди. Жамоада бир нафар тиббиёт ходими бор экан. Оғир ўйинларда бу камлик қилмайдими? Мураббий сифатида қўшимча тиббиёт ходимларини жалб қилишни сўрамаганмисиз?
- Жамоамиз янги ташкил топган. Камчиликларни секин-секин бартараф этиб боряпмиз. Раҳбарият томонидан тажрибали шифокор жалб қилинган. Бизнинг зиммамизда фақат яхши ўйин кўрсатиш қоляпти.
