Шоҳруҳ Ишанов: "Ҳар ўйинда ҳимоя чизиғи бизга панд беряпти"

- "Хоразм" жамоасини ғалаба билан табриклайман. Ўйинга келадиган бўлсак, яна ҳимояда жуда кўп хатолар қилдик. Иккита голни стандартдан кейин ўтказиб юборяпмиз. Ҳимоячиларимизнинг пала-партишлиги сабабли шундай голлар уриб кетишди. Мураббийлар штаби билан ўйинни кўриб чиқиб, хатолар устида ишлаймиз. Ҳар ўйинда ҳимоя чизиғи бизга панд беряпти. Кўриниб турибди, "Хоразм" жамоаси ҳам бу ўйинга қаттиқ тайёргарлик кўрган. Биз ҳам баҳсга яхши тайёрлангандик, аммо ҳимояда оқсаяпмиз. 

- Жамоангиз биринчи даврани яхши ўтказди, бироқ иккинчи даврада натижалар пасайиб кетди.

- Ҳозир таркибда янги 7 футболчи бор. Улар бизнинг фалсафамизни энди-энди тушунишмоқда. Асосий футболчиларимизга катта жамоалардан таклифлар бўлди, уларни ушлаб тура олмадик ва жамоадан кетишди. Ёш ўйинчиларга тажриба беряпмиз. Катта футболчиларни жамоага таклиф қилмадик. Айнан ёш футболчилар орқали таркибни шакллантиряпмиз. Яна бир-икки ўйиндан кейин улар ҳам биз истаётган футболни тушуниб олишади. 

- "Андижон-SGS" лойиҳаси яхши бошланганди. Хориж сафарларини кўрдик, яхши жамоалар билан ўйинлар ташкил қилинди. Бироқ иккинчи даврадаги пасайиш нима билан боғлиқ. Гап молиявий томондами?

- Молиявий томондан ҳеч қачон муаммоимиз бўлмаган ва бундан кейин ҳам бўлмайди деган умиддаман. Раҳбаримиз, клуб президенти бунга жуда жиддий қарайди. У кишига раҳмат айтаман. Айтганимдек, ёш футболчилар олиб келдик. Ҳали Про-лигада ўзимиз истаётган ўйинни кўрсатамиз.

- "Хоразм" жамоаси айнан қайси устунлик эвазига ғалабага эришди деб ўйлайсиз?

- Тезлик эвазига бугун мағлуб бўлдик.