Шавкат Саидов: "Навбаҳор"нинг олий лигада қолишини барча бекободликлар, “Металлург” клуби чин дилдан хоҳлайди"

Шавкат Саидов, “Металлург” ФК жамоа бошлиғи: Бугун чиройли, ҳужумкор футбол намойиш этдик. Йирик ғалаба учун барча футболчиларимизга миннатдорчилик билдираман. Биринчи бўлиб ўз дарвозамиздан гол ўтказиб юборган бўлсакда, Тошкентда “Бунёдкор”га қарши кечган учрашувдан фарқли ўлароқ яратилган вазиятлардан унумли фойдаландик. Йигитлар ўзларини йўқотиб қўйишмади. Бутун ўйин давомида ҳужумкор футбол намойиш этишди ва Бекобод аҳлини хурсанд этишди.

“Навбаҳор” шонли тарихга эга, мамлакатимизнинг етакчи клубларидан бири бўлиб келган. Бу жамоанинг олий лигада ўз ўрни, мавқеини сақлаб қолишини биз – барча бекободликлар, “Металлург” футбол клуби вакиллари чин дилдан хоҳлаймиз. Бугун улар учрашувни жуда фаол бошлашганди. Аммо айни пайтда жамоанинг эгаллаб турган мавқеи ўйинчиларнинг психологиясига қаттиқ таъсир кўрсатганлиги сезилиб турди. Бошлаган ишларини охиригача етказа олишмади. Чизиқлардаги узилишлардан, бўшлиқлардан эса биз унумли фойдаландик. Биринчи таймнинг ўзидаёқ йирик ҳисоб қайд этилганидан кейин эса “Навбаҳор” қаршиликни тўхтатди. Кейинги учрашувларда “Навбаҳор”га омад тилайман, дейди Шавкат Саидов.

"Металлург" матбуот хизмати