Шаҳбоз Эркинов: “Чемпионат якунида мухлисларимизни хурсанд қилишимиз керак”
26 окт 2016 23:30
Янгиликлар

Шаҳбоз Эркинов: “Чемпионат якунида мухлисларимизни хурсанд қилишимиз керак”

Қаршида бўлиб ўтган “Насаф” – “Навбаҳор” ўйинида қаршиликлар ҳужумчиси Шаҳбоз Эркинов биринчи бўлим сўнггида наманганликлар дарвозасини аниқ нишонга олиб, мезбонларнинг йирик ғалабасига муносиб улуш қўшди.

Эркинов ўз фикрларини билдириб ўтди: - Бир тур олдин ютқизишимиз керак бўлмаган ўйинда имкониятни бой бергандик. Шу сабабли бу сафар фақат ғалаба қозонишни мақсад қилгандик. Учрашув давомида рақибдан ҳар томонлама кучли эканлигимизни амалда намойиш эта олдик. Чемпионатнинг қолган турларида ҳам чиройли ўйинлар намойиш этиб мухлисларимизни ҳурсанд қилишимиз лозим. “Навбаҳор” жамоаси мен учун бегона клуб эмас. Шу сабабли, клубнинг айни пайтдаги ҳолатига бефарқ эмасман.

Давралар оралиғида “Навбаҳор”ни бир қатор футболчилар тарк этишди. Шу сабабли, жамоа асосан маҳаллий футболчиларига таяниб тўп сурмоқда. Жамоада айни пайтда қандай муҳит хукмрон эканлигидан хабарим йўқ. Икки йил давомида “Навбаҳор”да тўп сурдим. Биз ўйнаган пайтда ёмон жамоа шаклланмаганди. Футболчилар майдонда бир-бирларини яхши тушунган ҳолда ҳаракат қилишаётганди.

Назаримда Бахтиёр Ашурматовни бекорга истеъфога чиқаришди. Айнан Ашурматов кетгач, таркибда жамланган футболчилар ҳам жамоани тарк этишга қарор қилишганди. Бу менинг шахсий фикрим, шу сабабли бошқалар бу фикрга қўшилмаслиги ҳам мумкин.

Ҳавола :

Манба : championat.asia

Янгиликларни Телеграмда ўқинг!

Рейтинг: +1