Самвел Бабаян: "Эрон билан ўйин учун таркибни бир кун олдин аниқлаймиз"

"Бугун биз учун жуда ўйиндан олдинги ўртоқлик учрашуви ўтказилди. Бизнинг вазифамиз ўйин сифатини яхшилаб Эрон билан ўйинга яхши формада етиб бориш", - дейди Бабаян.

- Бугунги ўйинда Ҳимоядан кўнглингиз тўлдими?
- Биз гол ўтказмадик. Буни таҳлил қилиб чиқамиз. Бугун кўплаб асосий таркиб ўйинчилари майдонга тушишмади. Умид қиламанки, кейинги баҳсда улар бизга ёрдам беришади.

- Узоқ масофалардан зарба беришнинг фойдасини Рашидов мисолида кўрдик. Буни машғулотларда ҳам синовдан ўтказаяпсизми?
- Албатта биз турлича ўйнашга интилишимиз керак. Узоқдан зарба бериш устида ҳам ишлаймиз.

- Таиланд ҳақида нима дея оласиз? Жамоа сафига янги мураббий ва янги футболчилар келишди...
- Биз бу жамоани ўрганиб чиқдик. Ўзбекистон билан ўйиндан олдин сизларда мураббий алмашди. Таиланд бугун бизга жуда катта қийинчиликлар туғдирди. Райевац жуда тажрибали ва ҳурматли мураббий саналади. Бу жамоа ЖЧ-2018 саралашида иштирок этаётганининг ўзи кўп нарсани англатиб турибди.

- Бугун Темурхўжа Абдухолиқов захирадан майдонга тушиб гол урди. Бу Эрон билан ўйинда ҳужумда ким тушиши борасида қарорингизни аниқлаб бердими?
- Эрон билан ўйининг асосий таркибини учрашувга бир кун қолганида аниқлаймиз.

- Эрон билан ўйинда бугунгидек мухлислар бўлмайди, 100 минг одам бўлади. Таиланднинг ҳимоясидек ҳимоя бўлмайди, Бикмаевнинг имкониятидек имкониятлар бўлмайди...
- Айтганимдек гол ўтказмадик. Аммо ҳали бу ўйинни кўп бор таҳлил қилиб чиқишимиз керак. Эроннинг Черногория билан ўртоқлик учрашувини ҳам кўрамиз ва ўрганамиз. Ўйин сифатида борасида ҳали анча кўп иш қилишимиз керак.

- Бикмаев жароҳат олиб майдонни тарк этди. Унинг ҳолати қандай?
- Эртага тиббий текширувдан ўтади. Шундан кейингина унинг ҳолати аниқ бўлади. Умид қиламизки у Эрон билан ўйинда бизга ёрдам бера олади. Ўз клубида жуда яхши мавсумни ўтказмоқда.

- Гейнрихга кўпроқ дақиқа имконият тақдим этилди. Нимадир режалаштирилганми?
- Саша бутун вужуди билан терма жамоада ўйнайдиган футболчилардан бири. Унинг ҳолатини текширувдан ўтказиш учун кўпроқ ўйнади. Абдухолиқов, Ҳайдаров бир ойдан буён ўйин амалиётига эга бўлишмаётганди. "Локомотив" клубига раҳмат, улар машғулот ўтказиб туришди. Аммо ўйин билан машғулотнинг фарқи катта.

Нарзулла Сайдуллаев