Самвел Бабаян: “Бизда бир қатор йўқотишлар бор. Гуруҳдан чиқиш вазифасини бажаришимиз керак”

Самвел Бабаян: - Хайрли кеч. Эртага жамоамизни жуда муҳим ўйин кутиб турибди. Яна бир бор Қатарда бўлиб турганимдан хурсандман. Бу ерда футбол учун жуда идеал шароитлар яратилган. Рақиб ҳақида нима дейишим мумкин? Биз жуда яхши жамоага қарши майдонга тушамиз. “Ал-Аҳли” - бу Қатар футболининг тарихи ҳисобланади. Бу клубда савияли ўйинчилар жамланган. Юлиан Дракслерни алоҳида таъкидлаб ўтиш керак. У “Ал-Аҳли”даги статуси юқори бўлган легионерлардан бири. Биз эртага кучли рақиб билан ўйнаймиз. Кўп нарсага эътибор бермаймиз ва ўз мақсадимизга эришиш учун ҳаракат қиламиз. Яқиндагина клубни қабул қилиб олдим. Жамоа бироз қийин вазиятда қолган. Олдимизда иккита муҳим ўйин қолганди. Бири чемпионатда, иккинчиси ОЧЛ 2 мусобақасида. Биринчисини яхши бажардик, иккинчиси эса эртага бўлади. Бошчилигимда албатта бу вазифани ҳам бажаришга ҳаракат қиламиз. Ижобий натижага эришиб гуруҳдан чиқишга интиламиз. 

Дамир Темиров: - Жамоамизда муҳит зўр. Ҳаммамиз жанговар ҳолатда келдик. Худо хоҳласа, эртага ютишга ҳаракат қиламиз.

- Эртанги учрашувда кимлар майдонга туша олмайди?

Самвел Бабаян: - Афсуски, бизда бир қатор йўқотишлар бор. Оилавий сабабларга кўра асосий ўйинчиларимиздан бири Отабек Жўрақўзиев бу ўйинга кела олмади. Мавсум охирларига яқин бир қатор футболчиларда жароҳатлар бор эди. Лекин иложи борича ушбу учрашувга яхши ҳолатда етиб келишга ҳаракат қилдик. 

- Сизни Қатар жамоаларига қарши ўйинлардаги натижангиз ижобий. Масалан, охирги марта “Навбаҳор” бош мураббийи сифатида бу ерда “Ал-Вакра”ни мағлуб этгансиз. Яъни, Қатардаги ғалабали юришингизни бу сафар ҳам давом эттиришингизга қанчалик ишоняпсиз?

Самвел Бабаян: - Ҳа, ҳақиқатан Қатар жамоаларига қарши ўйнаш борасида тажриба кўп. 2023-йилда “Навбаҳор”ни ўзим тузгандим. Яхши натижалар кўрсатган. Ўзим йиғганим учун ўйинчилар фалсафамизни тўлиқ тушуниб етишганди. Ҳозирги пайтга тўхталсам, мен 4 ҳафта аввал жамоани қабул қилиб олдим. Яъни, клуб қандай ҳолатда бўлса шундайлигича қабул қилдим. Уч ҳафтадан бери биз биргаликда қаттиқ ишлаяпмиз. Ишонаманки, жамоамизни потенциали юқори. Шуни айтишим мумкинки, ўтган турда ўз уйида “Аркадаг”ни ютиб, вазифани ҳал қилса бўладиган даражада салоҳияти юқори жамоа эди. Жамоа билан бирга бўлиб, машғулотларни ўтказиб, клубни салоҳияти юқори эканига ишонч ҳосил қилдим. Лекин шундай бўлса-да, бу ҳол эртанги учрашув олдидан зиммамиздан масъулиятни олиб қўймайди. Ҳозир шундай ҳолатдамизки, биз янада жипслашишимиз керак. Аввалги қилинган хатоларни тўғрилашимиз ва гуруҳдан чиқиш вазифасини бажаришимиз керак.