Рўзиқул Бердиев: "Фабио Каннаваронинг ўйинга келгани ёқимли. Бироқ бу қаердадир ҳалақит қилиши ҳам мумкин"

- Ўйин ҳақида фикрларингиз?

- Мухлисларни ғалаба билан табриклайман. Бугунги ўйинда футболчилар катта куч сарфлади ва мухлисларга ғалабани тақдим этди. Бундан хурсандмиз. Кўп рақиб жамоалар бизнинг майдонга келганда, нафақат биз билан ўйнаганда, балки бошқа жамоалар ҳам беш ҳимоячилик тизимга ўтиб олиши тенденцияга айланди. Кеча санаб чиқдик, кўп жамоалар бешталик ҳимоячи тизимига ўтиб олган. Бундай вазиятларда тезкор гол уриб, рақибни хато қилишга мажбур қилиш керак. Кейин вазифа енгиллашади. Стандарт вазият ишладик, кейин рақиб очилишга, қарши ҳужумда ўйнашга ҳаракат қилди. Биз ҳам қарши ҳужумларда яхши ўйнадик. Бундай пайтда ҳужумдаги футболчиларимиз кўп вазият излаши керак бўлади. Бу иш қанчалик қийин бўлса-да, яхши амалга оширишди.

- Ғалаба билан табриклаймиз. Бугун Чоловичнинг позицияси ўзгарганини кўрдик. Бу Насруллаевнинг асосий таркибда тушмагани билан боғлиқми ёки Стефан янги позицияга ўрганмоқдами?

- Агар эътибор берган бўлсангиз, баъзи ўйинларда биз шундай схемада ўйнаяпмиз. 4-3-3 схемасида ўйнаяпмиз, лекин футболчиларни жойлашуви орқали биз стандарт 4-3-3 схемасидан бироз фарқ қиляпти. Машғулотларда бу борада ишлагандик, "Бухоро"га қарши ўйинда шу тактикада ўйнагандик. Бу қанчалик қўл келаётганини ўйинларда кўряпмиз. Шу сабабли футболчининг позициясини ўзгартирдик. У ёмон ҳаракат қилмади деб ўйлайман. Шерзод эса ушбу мавсумда кўп ўйин ўтказди. У кеча эрталаб бизнинг ихтиёримизга етиб келди. Унинг ҳолати унчалик яхши эмасди. Лекин ўйинга яхши қўшилди ва ўйинга нуқта қўйди.

- Уч нафар футболчи термага кетганида ўйин кўчириларди. Бироқ "Насаф"нинг бир қанча футболчилари термага кетди. Лекин ўйин қолдирилмади. Бу борада адолат бўлиши керакми?

- Биз бу борада мурожаат қилдик. Умар ва Ҳусайн термага чақирилганидан кейин ПФЛга ҳам, "Қўқон-1912"га ҳам, терма жамоага ҳам мурожаат билан чиқдик.  Ўйин вақтига анча яқин қолгани учун бу баҳсни бекор қила олмадик. Бугунги ўйинда футболчилар ҳар хил ҳолатда келган бўлса-да, ғалаба жуда муҳим эди. Футболчиларнинг ҳолатига қараб биз бор имкониятни ишга солдик. Албатта бу оғир. Футболчиларнинг ҳолати ҳар хил эди. Беш футболчимиз миллий, Сардор Баҳромов олимпия термамизда эди. Бу ташвишли ҳолат эди. Лекин йигитлар майдонда қўлдан келганча ҳаракат қилди ва ғалаба муҳимлигини билишарди.

- Элит ОЧЛда навбатдаги ўйин БААда "Ал Шабаб"га қарши бўлади. Бу дастлабки икки рақиб каби савияда эмас. Бу учрашувдан нима кутяпсиз?

- Даражаси паст деб бўлмайди. "Ал Шабаб"нинг даражаси "Ал Ҳилол" каби деса бўлади. Саудия Арабистони жамоалари таркибида терма жамоа футболчилари бор эди. "Ал Шабаб"да эса маҳаллий футболчилар жуда ҳам кам. Шунингдек, маҳаллийлаштирилган футболчилари ҳам бор. Шу боисдан айта оламан, биз легионерларга қарши ўйнашимиз керак бўлади. Бу лигада ҳам муносиб қатнашишни мақсад қилганмиз. Лекин рақибнинг жиддийлигини кўриб турибсизлар. Шунга қарамасдан йигитларни яхши тайёрлаб, яхши натижа учун курашишга ҳаракат қиламиз.

- Сафар олдидан "Насаф"да йўқотишлар йўқми?

- Бу ўйингача йўқотишлар бор эди. Шароф Муҳиддинов ҳамда Жавоҳир Сиддиқов жароҳати сабабли ўйинларда қатнашмаётганди. Икки кун бўлди уларнинг машғулотга қўшилганига. Биз таваккал қилиб, уларни ўйинга қўймадик. Умид қиламанки кейинги баҳсгача ўзига келиб олади. Шунингдек, йўқотиш деб бемалол айта оламан, асосий футболчиларимиздан бири Мурод Раҳматов сафдан чиқди. Унинг позициясида бошқа футболчиларни ўйнатишга мажбур бўляпмиз. Акмал Мозговой кетганидан кейин Мурод ушбу нуқтада ўзини яхши кўрсатаётганди. Ўйинни бошлашда, рақиб ҳужумини тўхтатишда, темпда яхши эди. Унинг ўрнини тўлдиришга ҳаракат қиляпмиз. Мурод Раҳматов кейинги ўйинларда бизга ёрдам бера олмайди.

- Бугун Фабио Каннаваро ўйинни стадиондан кузатди? Ушбу ҳолатни сездингизми? Буни билган футболчилар ўзини кўпроқ кўрсатишга ҳаракат қилдими? Ушбу футболчилар кимлар?

- Терма жамоамизни мураббийлари маҳаллий чемпионат ўйинларини кузатиши ёқимли ҳолат деб ўйлайман. Чунки у янги келган, футболчиларни ўз кўзи билан кўриб олса, кўп маълумотлар олиши мумкин. Бу эса ёқимли ҳолат. Йигитлар балки билгандир. Менга ҳам буни айтишганди. Бироқ футболчилардан ўйинга кўпроқ эътибор беришларини талаб қилгандик. Бу тўғрироқ ҳолат. Агарда футболчилар ўз вазифасига кўпроқ эътибор берса, ўйин яхши ўтади. Айтганимдек, бу ёқимли ҳолат. Лекин қаердадир бу жамоага ҳалақит қилиши мумкин. Бундан хурсандмиз. Бу жуда ҳам зўр иш. Агарда бирор футболчимиз унга ёққан бўлса, имкониятларини кўриб олди.