Россиялик мураббий Станислав Коротаев: "Биз Ўзбекистон терма жамоаси билан ўйнашдан хурсанд бўламиз"

"Бу терма жамоамизнинг иккинчи йиғини бўлади. Биринчиси апрель ойида Москвада ўтказилганди. Энди эса Тошкентга йўл оляпмиз. Ушбу йиғинга таркибни РПЛ клубларининг ўсмирлар жамоаси ўртасидаги РФИ Кубокларида қатнашмайдиган футболчилардан шакллантирдик. Мусобақа шу кунларда Кримскда ўз якунига етади. Биз РПЛ клублари академиясида ўйнаётганлардан кўра, диққат-эътибордан четда қолиб кетаётган йигитларга қаратдик. Уларни Ўзбекистон терма жамоасига қарши ўртоқлик ўйинларида кўриб оламиз. 

Айни пайтда бизда рақиб ҳақида маълумот кам. У жамоа ҳам бизники каби энди шакллантирилмоқда. Аммо шубҳасиз, биз ўзбек футболчилари билан ўйнашдан хурсандмиз. Халқаро спарринг - доимо яхши. Бу ўйинлар шаклланаётган жамоамиз учун жуда фойдали бўлади", - дея Коротаевнинг сўзларидан иқтибос келтирмоқда РФИ расмий сайти.