Қозоғистонда ҳалок бўлган ҳамюртларимиз яқинларига таъзия билдирамиз
18 янв 2018 19:53
Янгиликлар

Қозоғистонда ҳалок бўлган ҳамюртларимиз яқинларига таъзия билдирамиз

Бугун, 18 январь куни Қозоғистоннинг Ақтобе вилояти Иргиз туманида Россияга йўл олган 52 нафар ўзбекистонлик автобусда ёниб кетди.

Ушбу фожеали воқеа муносабати билан ҳалок бўлган ватандошларимизнинг оиласи ва яқинларига чуқур ҳамдардлик изҳор этамиз.

Ўзбекистон Республикаси Фавқулодда вазиятлар вазирлигининг маълумотига кўра, 2018-йил 18-январ куни маҳаллий вақт билан соат 10:30 да Ақтўбе вилояти Ирғиз туманида “Самара-Чимкент” автомобил йўлининг 1068-километрида, Калибай аҳоли пунктидан 10-км. узоқликда “Икарус” русумли йўловчи автобуси ҳаракатланиш чоғида ёниб кетган.

Автобус салонида 55 нафар йўловчи (дастлабки маълумотларга қараганда Ўзбекистон фуқаролари) ва 2 нафар ҳайдовчилар бор бўлиб, улардан 5 кишига Қозоғистон Ички ишлар вазирлиги Фавқулодда вазиятлар қўмитасининг Ҳалокатларда тиббий ёрдам кўрсатиш маркази томонидан тиббий ёрдам берилган, қолган 52 киши воқеа жойида вафот этган.

Шу муносабат билан Ўзбекистоннинг Қозоғистондаги Элчихонаси ходимлари жойида ёрдам кўрсатиш учун зудлик билан Ирғиз туманига юборилди.