Про лигада VAR бўлиши керакми? Анвар Бердиев ўз таклифини билдирди

Анвар Бердиев устозлигидаги “Оқ бўрилар” Ҳоким Кубоги финалида “Лочин ҚДУ” жамоасига қарши майдонга чиқди. Қизиқарли ва голларга бой ўтган ўйинда ғузорликлар 3:2 ҳисобида ғалаба қозонди ва бош совринга эга чиқди. Ғузорликлар бош мураббийи Анвар Бердиев бу ҳақида ўз фикрларини билдирди. 

- Про лига баҳсларига кўрилаётган ҳозирлик ҳақида...

- Жамоамиз 7 январь куни йиғилди. 30 январгача бўлган машғулотларда асосий эътиборни жисмоний ҳолатимизни тиклашга қаратдик. Бу оралиқда "Машъал" ва "Насаф" U-21 жамоалари билан назорат учрашуви ўтказдик. Шу билан тайёргарлигимизнинг биринчи босқичини якунладик. Иккинчи босқичда "Ҳоким Кубоги"да иштирок этиш айни муддао бўлди. 7-17 февраль кунларида бу турнирда финалгача етиб бориб ғолиб чиқдик. Бундан сўнг 3 кунлик танаффус бердик ва 21 февраль санасидан учинчи босқичга киришдик. Эндиликда март ойигача ўз қароргоҳимизда шуғулланамиз. Асосий эътибор бўлажак ўйинларга қаратилади. Тайёргарлик жараёнида қилишимиз керак бўлган барча ишларни амалга оширдик. Бунинг учун клубимиз раҳбарларига миннатдорчилик билдираман. 

- Қайси позицияларни кучайтиришга ҳаракат қиляпсиз?

- Таркибимизда ўзгаришлар юз берди. "Шўртан" жамоаси олдига Суперлигага чиқиш вазифаси қўйилди. Ҳар бир чизиқни кучайтиришга ҳаракат қилдик. Ўзимизга керакли футболчилар билан шартнома туздик. Ўйлайманки, улар билан олдимизга қўйилган вазифани бажаришга ҳаракат қиламиз. 

- Про лигада 8та жамоа иштирок этади. Бунга муносабатингиз қандай?

- Про лигада 8та жамоа 4 давра ўйнайди. Ўйинлар кўпайгани анча хурсанд қилади. Футболчиларимиз шунга қараб ҳам астойдил тайёрланишяпти. Про лигада ўткинчи ўйинлар бўлмайди. Жамоалар камайгани ҳар бир ўйин шиддатли ўтишини таъминлайди. 

- Про лиганинг асосий муаммоси нимада, деб ўйлайсиз?

- Мен раҳбар эмасман. Ўзимнинг таклифим, марказий ўйинларга VAR тизими қўлланилганида яхши бўлар эди.