Олис масофадан дарвозани ишғол этиб, тур голига муаллифлик қилган ярим ҳимоячи, дарвозани "қуруқ" сақлаб, жамоаси ғалабага эришишига кўмаклашган посбон — Суперлигада 25-тур лауреатлари

"Championat.asia" ўтказилган баҳслар асосида тур лауреатларини аниқлади.

"Бунёдкор" аъзоси Сарвар Каримов "Championat.asia" сайти талқинига кўра 25-турнинг энг яхши дарвозабони деб топилди. 

"Қалдирғочлар" дарвозабони ортда қолган турда ўзини ҳар тарафлама кўрсатиб, дарвозаси дахлсизлигини сақлаб қолди, унинг жамоаси "Металлург"ни 1:0 ҳисобида енгишга эришди.

"Олимпик" иқтидорли ярим ҳимоячиси Шерзод Эсанов "Championat.asia" талқинида 25-турнинг энг яхши футболчиси дея эълон қилинди.  

"Олимпик" вакили "Навбаҳор"га қарши беллашувда фаол ҳаракатлари билан ажралиб турди ва чиройли гол уриб, жамоаси ғалаба қозонишида катта ҳисса қўшди.

"Олимпик" хавбеки Шерзод Эсановнинг 86-дақиқада "Навбаҳор" дарвозасига киритган тўпи "Championat.asia" талқинига кўра 25-турнинг энг чиройли голи (ВИДЕО) деб тан олинди. 

Чап қанотда тўп тепган ярим ҳимоячи наманганликлар билан учрашувда тиним билмади ва ўйин якунига оз қолганида олис масофадан йўллаган зарбаси орқали ҳисобни оширди. 

"Олимпик" бош мураббийи Тимур Кападзе "Championat.asia" талқинига кўра 25-турнинг энг яхши мураббийи сифатида эътироф этилди.

"Олимпик" ушбу турда совринли ўрин учун курашаётган "Навбаҳор"ни меҳмон қилиб, 2:1 ҳисобида зафар қучди. Олимпиячилар устози Кападзе таркибда бир қанча муаммолар борлигига қарамай, ротацияга қўл урилган таркибни майдонга туширди ва унинг танлови ўзини оқлаб, жамоа ғалаба қозонишга эришди.