ЎФФ президенти "Бенфика" клуби шароити билан танишди

Ташриф доирасида томонлар ўртасида расмий учрашув бўлиб ўтди.

Учрашувда "Бенфика" футбол клубининг футзал бўйича бошқарув директори Мигел Рейс ва клубнинг халқаро ҳамкорлик бўйича департаменти директори Лоренцо Феррейра иштирок этди.

Учрашув аввалида мезбонлар ўзбекистонлик меҳмонларга "Бенфика" клубининг замонавий инфратузилмаси, ходимлар фаолияти ҳамда футболчилар учун яратилган шароитлар билан яқиндан таништиришди.

Мулоқот чоғида икки мамлакат футзал клублари ўртасида ҳамкорликни йўлга қўйиш, тажриба алмашиш, қўшма машғулотлар ташкил этиш, ёшлар ва ўсмирлар билан ишлаш тизимини ривожлантириш, мураббийлар малакасини ошириш ҳамда португалиялик мутахассисларни Ўзбекистонга жалб этиш масалалари муҳокама этилди.

Шунингдек, келгуси мавсумда клублар миқёсида икки мамлакат мутахассислари учун ўқув курсларини ташкил этиш ва тажриба алмашиш бўйича қўшма лойиҳаларни амалга ошириш юзасидан келишувга эришилди.

Суҳбат давомида "Бенфика" клуби орқали Португалия футзалининг илғор тажрибаларини Ўзбекистонга татбиқ этиш, икки мамлакат футзал федерациялари ўртасида ҳамкорликни йўлга қўйиш ва ривожлантириш истиқболлари ҳам кўриб чиқилди.

Учрашув якунида келгуси мавсумда "Бенфика" ҳамда БМБ хусусий футзал клублари ўртасида ўртоқлик учрашувини ташкил этиш, ўзбекистонлик иқтидорли ёшларни Португалиянинг нуфузли клубларига жалб этиш, уларнинг истеъдодини камолга етказиш ҳамда "Бенфика" орқали жаҳоннинг элит клубларига ўтишини таъминлаш масалалари бўйича келишиб олинди.

Томонлар фикрига кўра, ушбу ҳамкорлик нафақат клублар, балки икки мамлакат футзали ривожига ҳам салмоқли ҳисса қўшиши кутилмоқда.