Хўш, 20 ёшидаёқ легионер мақомини олган Абдумажидов янги жамоага мослашиб кета олдими? Буни унинг фикрларида билиш мумкин.
“Секин-аста Қозоғистон чемпионатига ҳам мослашиб боряпман. Тўғри, тўлиқ мослашиб кетдим дея олмайман. Чунки янги муҳит, бу ерда биринчи маротаба ўйнаяпман. Ўйинга-ўйинга барчаси яхши бўлмоқда.
Худога шукр, бош мураббийнинг муносабати жуда яхши. Ишонч билдирмоқда. Мен ҳам унинг ишончларини оқлаш учун майдонда боримни бериб ўйнамоқдаман.
Қозоғистон чемпионатига келсак, бу ерда ҳар бир жамоанинг кучи бир-бирига жуда яқин экан. Айрим жамоалар сафида кучли легионерлар бор. Улар баъзида ўйин тақдирини ўзлари ҳал қилишади. Шу сабабли клублар хорижлик ижрочиларга катта эътибор қаратишаркан. Чиндан ҳам чемпионат ёмон эмас. Асосийси, курашларга бой ва муросасиз кечаркан. Бу эса ўсишга янада туртки бўлади”, - дея сўзларини якунлади Абдумажидов.
