Ўйиндан кейинги матбуот анжуманида японлар бош мураббийи Такафуми Хори қуйидаги фикрларни билдирди:
- "Сафарда 1:1 ўйнаш яхши натижа, ҳали олдинда жавоб баҳси бор ва Сайтамада бутунлай бошқача ўйин гувоҳи бўламиз. "Ал Ҳилол" ўз майдонида кучли ўйин намойиш этади, лекин биз уларнинг қаршилигини енгиб ўта олдик".
- "Жавоб баҳсида имконият кўпроқ биз томонда бўлади деб ўйлайман. Биринчи ўйинда ҳимоявий ўйнадик деб айтолмайман, лекин бундай катта ўйинларда ҳимояни ўйламасдан ўйнаб бўлмайди".
"Ал Ҳилол" бош мураббийи Рамон Диаз эса ўйиндан кейин шундай деди:
- "Биз ўйинни бирмунча секин бошладик ва кутилмаганда тезкор гол ўтказиб юбордик. Лекин шогирдларимнинг ҳаракатидан қониқдим. Жавоб баҳсида фақат ғалаба учун майдонга тушамиз, энди Японияда гол уришимиз шарт. Ҳакамнинг финал ҳуштаги янграмагунча кураш давом этади".
- "Агар бугун хавфли вазиятлар содир этмаганимизда бу мени хавотирга соларди. Чунки футболда вазият ярата олмаслик, жамоанг ўйнамаётганини кўрсатади. Саудиялик мухлисларга айтадиган гапим: хавотир олманглар, ҳаммаси яхши бўлади".
Эслатиб ўтамиз, финалнинг иккинчи ўйини 25 ноябрь куни Япониянинг Сайтама шаҳрида ўтказилади.
