Нурилло Тўхтасинов: "Вадим Абрамовнинг қўлида 3 йил ўйнаганман. Самарқандда мухлисларни хурсанд қилишимиз керак"

Клуб яқинда ярим ҳимоячи Нурилло Тўхтасинов билан шартнома имзолади. Футболчи айни вақтда "Динамо"нинг Тошкентдаги йиғинида қатнашмоқда. Бугунги машғулотлар аввалида Тўхтасиновнинг фикрларини тингладик. 

- Икки йилдан ошиқ вақтни легионер сифатида ўтказдингиз. Малайзиядаги фаолиятингиздан қандай таассуротлар қолди?

- Малайзиядаги икки ярим йиллик фаолиятимда кўп нарса ўргандим. Ҳар бир футболчида легионерга айланиш орзуси бўлади, бу менда амалга ошганидан хурсандман. Барибир бошқа давлат футболи. Фаолиятимдан кўнглим тўлди дея оламан. Яхши хайрлашдик.

- "Теренггану" жамоасининг ёқимтойига айландингиз. Ишқибозлар ҳам сиз билан илиқ хайрлашди. Бу нимага боғиқ бўлди?

- У ерда мухлислар футболни яхши кўришади. Борганимда ҳам яхши кутиб олишган, мураббийлар, жамоа илиқ қарши олганди. Малайзияда ўзбекларни яхши кўрар экан, чунки аввалроқ Санжар Шоаҳмедов ва бошқа футболчилар ўзларидан яхши таассурот қолдиришган. "Теренггану"га келганимда Сардор Қулматов ҳам бор эди. Бу менга анча ёрдам вазифасини ўтаган.

- "Динамо" жамоасига ўтишингиз қандай юз берди? 

-"Теренггану" билан шартномам тугади. Клубда раҳбарлар ўзгарди. Ўзбекистондан таклифларим бор эди, Вадим Карленович "Динамо"га чорлади. Уларни қўл остида 3 йил ўйнаганман. 

- Ўтган йили жамоа совринли ўринлар учун курашди. Бу йил нима кутиляпти?

- "Динамо" ўтган йили муносиб натижа кўрсатди. Бу йил ўтган йилгидан яхшироқ натижа кўрсатишга ва чемпионлик учун курашишга ҳаракат қиламиз. Вадим Абрамов ҳам буни айтиб ўтди. Мухлисларни хурсанд қилишимиз керак.