"Нефтчи" собиқ футболчиси: "Легионерларни ФИФА ҳимоя қилади, маҳаллий футболчилар одам эмасми?"

Тез орада ФИФА клубдан трансфер тақиқини олиб ташлайди. Шу хабарни ўқиган "Нефтчи" клуби собиқ футболчиларидан бири сайтимиз билан боғланди ва ичидагиларни тўкиб сочди: 

"Клубларимиз доим легионер футболчиларнинг қарзларини биринчилардан бўлиб тўлаб беришади. Чунки уларни ФИФА ҳимоя қилади. Маҳаллий футболчилар эса "топар ойида олади". Нима маҳаллий футболчилар одам эмасми? Уларни оиласи, бола-чақаси йўқми? Йил давомида шу жамоа учун ўйнаймиз, лекин пешона теримизни ололмаймиз. Қизиғи бу нарса деярли ҳар йили такрорланаверади. Фақат "Нефтчи"да шунақа демоқчимасман. Ёки у клубда, ёки бу клубда шунақа бўлаверади. 2024 йилда "Нефтчи"да ўйнаган маҳаллий футболчилардан сўрангчи қачон охирги марта маош олишибди? Ҳозир ҳам клубда ўйнаётганлар дардини кимга айтишни ҳам билмайди. Чунки кўз-кўзга тушиши бор", - деди исм фамилияси сир қолишини сўраган "Нефтчи" собиқ футболчиларидан бири.