"Нефтчи" ижрочи директори: "Мақсадимиз - чемпионлик ва кубокни қўлга киритиш!"

"Нефтчи" 3-4 йилдан буён шаклланиб келмоқда. Ўтган йилги ва бу йилги мақсадимиз Суперлига чемпиони бўлиш, мамлакат кубогини қўлга киритиш. Агар бу совринларни ютсак Элит ОЧЛда иштирок этишимиз аниқ бўлади. Асосий мақсадимиз мана шу.

Жамоамиз асосий қисми ўзгарди. Клубга кўплаб янги футболчиларни жалб қилдик. 5-январдан буён машғулотларни кузатиб келяпмиз, барчаси тажрибали, масъулиятли ва "Нефтчи"га нима мақсадда келгани билиниб турибди. Янги футболчилар иштиёқ ва шижоат билан келишган, барчамизнинг мақсадимиз бир - Фарғонага Ўзбекистон чемпионлигини қайтариш.

Кунига 2 маҳал машғулотлар бўлмоқда, биринчи йиғинда 4 та фитнесс куни белгиланган. Бошида футболчиларга формага кириб олишда қийин бўлмоқда, чунки машғулотлар оғир. Лекин мураббийлар штаби ва клуб раҳбариятининг кўнгли тўлмоқда, чунки айтиб ўтганимдек ҳамма жон бериб ишламоқда. Меҳмонхонадаги шароитлар яхши, майдон ҳолати аъло даражада. Футболчилардан ҳали шароитлар бўйича шикоятлар келиб тушгани йўқ, ҳамма хурсанд. Бу ерга ҳеч ким дам олгани келмаган, ишлагани келганмиз. Ишлаш учун ҳамма шароит яратиб берилган.

"Нефтчи" яна икки нафар машҳур футболчи билан музокара олиб боряпмиз. Тез кунларда янгилик бўлиб қолади", - деди "Нефтчи" клуби ижрочи директори Муҳаммадсолиҳ Абдусатторов.