Тошкентда "Бунёдкор" - "Сўғдиёна", Самарқандда "Динамо" - "Пахтакор", Наманганда "Навбаҳор" - "Насаф" бугун ўзаро куч синашади. Шубҳасиз марказий ўйин Самвел Бабаян ва Рўзиқул Бердиев шогирдлари ўртасида кечади. Ушбу ўйинлар аввалида мутахассис фикри рукнимизда собиқ футболчи, мураббий Шуҳрат Раҳмонқуловнинг тахминлари ва мулоҳазаларини тингладик.

- Худо хоҳласа қизиқарли ўйин бўлади, деб ўйлайман. "Насаф" ҳар доим олдига совринли ўринларга эга чиқиш мақсадини қўяди. Ўтган йили Ўзбекистон кубогида ғолиб чиқди. Жамоавий ўйин яхши йўлга қўйилган. Жамоа ҳар доим ўзидан яхши таассурот қолдириб келган. Рўзиқул Бердиев қўл остида академия тарбияланувчилари кўпчиликни ташкил қилади. Лекин уларга бугун Наманганда осон бўлмаслиги аниқ. "Навбаҳор" ҳам қишда таркибини яхшилаб олди. Самвел Бабаян қаерда ишламасин доим яхши натижа учун ҳаракат қилади. Жамоасини юқори ўринларга олиб чиқишга уринади. Жуда жанговар таркиб йиғилган. Иккинчидан стадиондаги мухлислар ҳақиқий 12 ўйинчи бўлишади. Бошқа томондан жамоада ўйин сифати қандай йўлга қўйилгани қизиқ. Имкониятлар, ўйлашимча "Навбаҳор" ғалаба қозонса керак. Бунда асосий фактор мухлислар.

- "Бунёдкор" ҳам "Насаф" сингари ўз тарбияланувчиларига таянмоқда. "Сўғдиёна" Улуғбек Бақоев бошчилигида ўтган йилги натижани яхшилаш учун астойдил курашади. Қайсидир маънода бу ўйинда тажриба ўз сўзини айтиши мумкин. Таркибни ўзагини сақлаб қолди ва яна кучайтирди. Шахсан мен ҳар бир ўйин мухлислар кўрадиган ва томошабоп ўтишини, ундан завқ олишимизни истайман.

- "Динамо"нинг Суперлигага қайтиши маҳаллий ишқибозларни қувонтиргани бор гап. Улар ўз майдонларида ўйнашади. Фикримча, "Пахтакор" амалдаги чемпион, Суперкубок соҳиби сифатида фаворит. Бу билан самарқандликларни кучсиз, демоқчи эмасман. Улар ҳам яхши тайёргарлик кўрди, хорижда йиғинлар олиб борди. Таркибида легионерлар бор. Лекин реал олиб қараганда устунлик "Пахтакор" томонида. Бу - футбол. Унда ҳамма нарса рўй бериши мумкин. Жамоаларимиздан шиддатли ва стадионга келган мухлисларни зериктирмайдиган футбол кутиб қоламан.

Абдулазиз Искандаров ёзиб олди

Мутахассис фикри: "Насаф"га Наманганда осон бўлмайди. Самарқандда "Пахтакор" фаворит"