- Қийин ўйин бўлишини билардик ва натижа ўзимиз кутгандек чиқмади. Кўнгилни чўктирмасликка ҳаракат қиляпмиз, олдинда ҳали иккита учрашув бор ва шу ўйинларда ижобий натижа кўрсатишга ҳаракат қиламиз. Ўйлашимча, ёмон ўйин кўрсатмадик, гол ҳам урдик, лекин ютқазиб қўйдик.
- Сизнингча, жамоа қанчалик ўз ўйинини намойиш эта олди?
- Кўпроқ иккинчи таймдаги ўйинимиз ёқди. Биз босимдан чиқиб кета олдик ва ўз ўйинимизни кўрсатишга ўтдик. Агар биринчи таймда ҳам шундай ҳаракат қилганимизда балки натижа бошқача бўлармиди. Бу биз учун биринчи Жаҳон чемпионати ва мундиалдаги илк ўйинимиз бўлди. Хатоларни ўрганамиз, таҳлил қиламиз.
- Ўйин куни сиз учун кун қандай ўтди?
- Барибир спортчиларга хос ҳаяжон бўлди, лекин қўрқув умуман бўлмади. Одатдагидек тайёргарлик кўрдим. Китоб ўқидим, йигитлар билан гаплашдик, кулишдик, ўйин қандай кечишини кўз олдимиздан ўтказдик. Биз учун фақат стадион ниҳоятда катта эканлиги ва мухлисларнинг кўплиги ноодатий бўлди.
- Луис Диасни "ёпиш" қанчалик қийин экан?
- Мақсадимиз фақат бир футболчига эътибор қаратиб, Диасни ёки бошқасини "ёпиш" эмасди. Биз жамоавий ўйин кўрсатишга ҳаракат қилдик. Фарқи йўқ, рақиб ҳужумидан ким келса уларга нисбатан қаттиқ ўйнаб ўйин бермаслик эди. Бизга кимнидир персонал ёпиш вазифаси юклатилмади, урғу жамоавий ўйинга берилди.
- Ўйиндан кейин кийим алмаштириш хонасидаги кайфият қандай бўлди?
- Ютқазиб қўйганимиз алам қилди. Лекин ҳозир ҳамма тушуниб турибди: биз оддий турнирга келганимиз йўқ. Жаҳон чемпионлиги учун кураша оладиган жамоага қарши баҳс олиб бордик. Хатолар бўлди ва буларни тўғрилаш устида ишлаймиз. Кейинги баҳсларда камроқ хатога йўл қўйишга ҳаракат қиламиз.
- Учрашув ниҳоясига етгач биринчи ким билан гаплашдингиз?
- Ўйиндан сўнг кийим алмаштириш хонасига киришга улгурмадик. Бизни тўғри допинг назорат хонасига олиб кетишди. Телефоним кийим алмаштириш хонасида қолганди. Одатда ҳар ўйиндан кейин биринчи уйдагилар билан гаплашаман.
