Миржалол Қосимов: "Стадионга қанча мухлис ташриф буюришидан қатъи назар, улар учун майдонга тушамиз"

- Ўйин ҳақида фикрингиз...

- Жудаям зўр ўйини бўлди. Қолаверса, пенальтилар сериясида ғалаба қозонганимиз нур устига аъло нур бўлди. Жамоа мухлислари ва шогирдларимни мазкур ғалаба билан табриклайман. 

- ОКМК пенальтилар сериясига тайёргарлик кўрганмиди?

- Ўйинда ҳар қандай вазият бўлиши мумкин. Бу ҳам ишимизнинг бир бўлаги. Шу боис, серияга ҳам тайёрлангандик. Майдонга яхши ниятда чиқилади, лекин нима содир бўлишини ўйиндан кейин билиб оласиз. Ғалабадан хурсандман.

- Бугун сиз томондан ҳам, Бабаян томондан ҳам эътирозлар кўзга ташланди. Ҳакамлар бугунги ўйин даражасига мосмиди?

- Ўйин давомида ҳиссиётлари бўлиши табиий. Ўзимда бундай ҳолатлар кўп бўлган. Ҳатто 70 мингдан ортиқ томошабин қаршисида ҳам ўй-фикрлар фақат майдонда бўлади. Бу футболнинг бир қисми. Энг ёмон нарса — беғам бўлиш. Ҳакам икки томон зарарига ҳам ишлаган вазиятлар бўлди.

- Шогирдларингизда ғалабага бўлган кучли иштиёқ кўзга ташланди. Осиё Чемпионлар лигасида шу жиҳат етишмаётгандек...

- Четдан гапириш жудаям осон. Ҳар бир ўйинга ўзига яраша тайёргарлик кўрилади. Майдонга хоҳишсиз тушмаймиз. Бугун бир-бирига муносиб жамоалар майдонга тушди. Хатолар Европа футболида ҳам кузатилади. Биз ҳар бир ўйинга тайёргарлик кўрамиз. Стадионга қанча мухлис ташриф буюришидан қатъи назар, улар учун майдонга тушамиз. Ғалаба ва мағлубият ёнма-ён юради. 

- Ҳақназарий ва Санчес енгил жароҳати сабаб мажбуран захирага олинди. Чемпионлар лигасига қадар бу ўйинчилар тиклана оладими?

- Шу нарса бошни қотирмоқда. Уч кундан сўнг "Сепаҳон"га қарши майдонга тушамиз. Ушбу ўйингача тикланиб олиш ҳам керак. Жароҳатланганлар ҳам бор. Бу ҳам бир синов. Тезроқ тикланишимз керак. Зеро, тил шундай суяксиз нарсаки, ютганингда тепага олиб чиқиб қўяди, муваффақиятсизликка учрасанг, пастга судрайди.