Месси спортдаги энг буюк атлетлар ҳақида гапирди

Бу ҳақида NBC нашри хабар берди.

"Биз аргентиналиклар учун [Диего] Марадона ҳамма вақт кумир бўлган ва энг зўри сифатида гавдаланган. Мен кичкина болакайлигимда унинг ўйинларини жонли томоша қилганман. Диего барча маълум даражалардан устун эди", — деди Месси.

"Мен [Роджер] Федерер, Рафа [Надаль] ва [Новак] Жокович каби теннисчиларни қаттиқ ҳурмат қиламан ҳамда уларнинг учаласи ўз спорт турини даражаси ошишига муносиб улуш қўшган, деб ўйлайман. Улар энг кучли даврларида елкама-елка баҳслашиш орқали ҳам кучайиб боришган. Балки мен баъзи спортчиларни унутаётгандирман, аммо яна кимларнидир айтиб ўтиш керак бўлса — Леброн [Жеймс], Стеф [Карри] ҳам энг яхшилар қаторида. Уларга шунчаки қойил қоламан, ҳар бири ўзига хос тарзда спортга нимадир бера олган", — қўшимча қилди Лео.

Марадона ЖЧ-1986 ғолиби, Федерер — катта дубулға турнирларининг 20 карра чемпиони, Надаль — 22 карра чемпион, Жоковичда бундай чемпионлик унвонлари эса 24 тани ташкил қилади. Жеймс "НБА" — Миллий баскетбол ассоциациясининг тўрт карра чемпиони ҳисобланади ва Каррида ҳам худди шунча чемпионлик унвони бор.

Лео Мессининг ўзи ҳозирда 38 ёшда 2023 йилдан буён АҚШнинг "Интер Майами" клуби шарафини ҳимоя қилади. Фаолиятининг энг ёрқин қисмида Месси Испаниянинг "Барселона" ва Франциянинг ПСЖ клублари сафида тўп тепган. Аргентиналик 8-карра "Олтин тўп" соҳиби бўлиш билан бирга, терма жамоаси билан 2022 йили мундиалда ғолиб бўлган, Америка Кубогини (2021, 2024 йиллар), Финалиссимани (Европа ва Америка Кубоги чемпионлари ўртасидаги тўқнашув — 2022 йилда ўтказилган) ҳамда Олимпия ўйинлари (2008) ғолиби саналади.