Машарипов: "Бу Суриянинг энг заиф таркиби, Австралияда ҳам анча пасайиш бор"

"Жамоамиз бугун икки очко йўқотди деган фикрга қўшиламан.

Бугун бизда Осиё кубогидаги очилиш ва муҳим ўйин бўлгани учун бироз ҳаяжон сезилди. Мен бу Суриянинг энг заиф таркиби деб биламан. Улар фақат ҳимояга ётиб олишди ва ҳужумга чиқишмади. Киришга қийналдик, аммо 1-2 вазиятимиз бўлди ва улардан биттасидан гол уришимиз керак эди. Бундай ўйинларда жуда кам имконият бўлади. 

Бугун Ўзбекистон терма жамоасининг 60 фоиз ўйинини кўрсата олдик деб ўйлайман. Кейинги ўйинларда бундай бўлмайди. Бугун босим ва мухлислар томонидан кутилаётган натижа таъсир қилди ва шу сабаб эҳтиёткорлик билан ўйнадик.

Австралия — Ҳиндистон ўйинини кўрдим. Агар дарвозабоннинг хатоси бўлмаганда Австралиянинг гол уриши жуда қийин бўларди. Ҳиндистон ҳам ҳудди шундай 11 ўйинчи бўлиб орқага ётиб олган ва кейинги ўйин ҳам ҳудди шундай ўйнайди. Албатта, кейинги баҳсда худо хоҳласа гол урамиз.

Австралия терма жамоасида ҳозирда анча пасайиш бор ва бу энг заиф таркиби деб ўйлайман. Улардан бундай ўйин кутмагандик, Ҳиндистоннинг кичик хатосидан гол уриб кетишди. Кейинчалик ҳиндистонлик ўйинчилар ўйинни бироз ташлаб юборди.

Мураббий ўйинни кўриб чиқади. Ҳиндистон билан ўйинда олдинда ҳужумчи бўлгани яхши деб ўйлайман. Сабаби кўпроқ гол уришимиз ҳам керак", — дейди Машарипов.