"Манчестер Сити"нинг етакчи футболчилари ЕЧЛдаги мағлубиятдан сўнг, Норвегияга борган мухлисларининг ҳаражатларини қоплаб беришга қарор қилишди

"Манчестер Сити" ноқулай совуқ об-ҳавода кутилмаганда камтар рақибига 1:3 ҳисобида мағлуб бўлди. Бернарду Силва, Рубен Диаш, Родри ва Эрлинг Ҳоланд муваффақиятсиз натижани инобатга олиб, ўйинга ташриф буюрган 374 нафар жамоа мухлисларининг барча харажатларини қоплашга қарор қилишди.

"Мухлисларимиз биз учун ҳамма нарсадан қимматли. Улар бизни қўллаб-қувватлаш учун дунёнинг турли бурчакларидан келишларини ва бу қандай фидойилик эканлигини яхши биламиз. Буни ҳеч қачон эътибордан четда қолдирмаймиз. Улар дунёдаги энг ажойиб мухлислар.

Шунингдек, майдондаги оғир кечада, қаҳратон совуққа қарамасдан, бизни қўллаб-қувватлаш учун узоқ йўл босиб келган мухлисларимизнинг саъй-ҳаракатларини тан оламиз. Бодога сафар қилган мухлисларимизнинг чипталар учун тўлаган пулларини қоплаш - бу биз учун уларнинг олдидаги энг кичик бурч", дейилади "Сити"нинг асосий футболчилари берган қўшма баёнотда.

"Манчестер Сити" Чемпионлар лигасининг асосий босқичида 7-ўринни эгаллаб турибди ва 1/8 финалга тўғридан-тўғри чиқиш учун даъвогарлик қилмоқда.