"Кучли терма жамоалар билан ўйнаб ўзимизни ҳам Европага тайёрлаб борамиз". Дониёр Абдуманнопов Словакия ва Украина билан ўйинлар ҳақида

Мазкур мусобақада вакилларимиз Словакия (0:2), Украина (1:1) ва Қозоғистонлик (2:0) тенгқурларига қарши майдонга чиқишди. Юртимиздаги Осиё чемпионатига тайёргарлик кўраётган жамоамиз учун ушбу йиғин ва Европа жамоалари билан ўртоқлик учрашувлари фойдали бўлгани шубҳасиз. Биз эса бу борада Ўзбекистон U22 жамоаси аъзоси, "Андижон" футболчиси Дониёр Абдуманноповнинг фикрлари билан қизиқдик.

- Дастлаб Туркия йиғини ҳақидаги фикрларингиз билан ўртоқлашсангиз...

- Авваламбор ассалому алейкум. Туркия йиғини аъло даражада ўтди. Ташкилотчилик, шароитлар, майдонлар бари кўнгилдагидек бўлди, дея оламан. 

- Ўртоқлик учрашувларида рақиблик қилган Украина, Словакия, Қозоғистон жамоаларининг бизнинг футболчилардан қандай устун жиҳатларини кўра олдингиз?

- Украина ва Словакия яхши савиядаги жамоалар экан. Менинг фикримча улардан кам ўйнамадик. Биринчи учрашувда Словакия билан озгина қийналдик. Барибир илк ўйин ҳар доим осон бўлмайди. Словакиялик тенгқурларимиз бизга қараганда тезроқ ўйнашди, ҳаводаги тўпларда устунликка эга бўлишди. Шундай ўйинлар орқали халқаро тажриба орттириб борамиз. 

- Бунга қадар жамоамиз асосан Тошкентда маҳаллий клубларга қарши назорат баҳсларида иштирок этган эди. Нима, деб ўйлайсиз бундай буён кучли жамоалар билан беллашиш керакмикин? 

- Агар имкони бўлса жуда яхши бўларди. Бундай терма жамоалар билан ўйнаб ўзимизни ҳам Европага тайёрлаб борамиз. Менимча барча футболчилар айниқса бизнинг ёшдагилар Европа жамоаларида ўйнашни орзу қилса керак, деб ўйлайман. 

- Кейинги йилги Осиё чемпионати мезбонлиги Ўзбекистонга берилгани саралаш баҳслари олдидан қай даражада хотиржамлик беради? Чунки истаймизми йўқми футболчилар руҳиятида бу борада ўзгариш бўлади...

- Осиё чемпионатининг бизга берилгани ҳозирдан қаттиқ тайёргарлик кўришимизни англатади. Бу футболчиларга катта иштиёқ беради. Ўз майдонимизда, мухлисларимиз, яқинларимиз қаршисида тўп тепиш масъулияти юқори бўлишини тушуниб турибмиз. Албатта, босим ҳам бўлишини инкор қилмайман.

Абдулазиз Искандаров суҳбатлашди